IT Park Navoiy viloyatidan Suhrob Haydarovning ko‘plab g‘alaba va yutuqlarga ega muvaffaqiyat hikoyasini taqdim etmoqda. Suhrob 18 yoshda va hozir Toshkentda yashaydi.
U 14—15 yoshida IT sohasiga qiziqa boshlagan. Qahramonning xotiralariga ko‘ra, ilhom manbai imkoniyatlar, karyera o‘sishi va sanoat istiqbollari haqida hikoya qiluvchi reklama videosi edi.
Keyin u qaror qildi: IT kelajak kasbi va bu sohada yaxshi pul ishlashingiz mumkin ekanki, demak, u yerga borish kerak.
Men bu sohadagi ilk qadamlarimni 2018-yilda qo‘yganman. Aytish mumkinki, men darhol tushundim: IT bu — mening hayotim va men o‘z kasbimni tanlashda to‘g‘ri tanlov qilganimdan xursandman, — deydi Suhrob.
Suhrob boshidanoq robototexnikaga qiziqish bildirgan, biroq bu yo‘nalishda mentor topish oson bo‘lmagani uchun turli onlayn platformalar tufayli yo‘nalishni mustaqil o‘zlashtirishga qaror qilgan.
Keyin yengishimiz kerak bo‘lgan boshqa qiyinchiliklar ham bor edi. Masalan, “zapchast”lar va detallar bilan bog‘liq muammolar. Biz ularni boshqa mamlakatlardan buyurtma qilardik va ba’zida ular yetib kelguncha 90 kunlab kutishimizga to‘g‘ri kelardi, — deb eslaydi hikoya qahramoni.
Unga ko‘ra, endilikda bu qiyinchiliklar faqat xotiralarda qoldi — hozir detallarni sotib olish mumkin bo‘lgan do‘konlar, ushbu yo‘nalishni o‘rgatadigan o‘quv markazlari va uni o‘rgatadigan murabbiylar mavjud.
Hozirda ana shunday o‘qituvchilardan biri bo‘lib Suhrob ishlamoqda — u IT Park Toshkent filialida robototexnika bo‘yicha mentor. U avtonom va teleportatsiya qiluvchi robotlar uchun dasturlarni tuzadi.
O‘qituvchilik faoliyatim davomida, ya’ni 16 yoshimdan beri dars berganman, 300—400 dan ortiq o‘quvchilarim bor. Men bolalarga ham, kattalarga ham dars berishni yaxshi ko‘raman. Mening shogirdlarim 7 yoshdan 30 yoshgacha bo‘lgan odamlardir. Ular elektronika, dasturlash, konstruksiyalash va boshqalarni o‘rganmoqda, — deydi Suhrob.
Suhrob robototexnika bo‘yicha 6 karra xalqaro musobaqalar g‘olibi. Uning g‘alabalari orasida: Robofest Russia (3-o‘rin), Robobrain Serbia (2-o‘rin), Youth Techno Art Tashkent (1-o‘rin), Roboday Bulgaria online (1-o‘rin), Kazrobofest online (1-o‘rin), WRO Hungary-Atsian (1-o‘rin), World skills (3-o‘rin) mavjud.
O‘z ishiga bo‘lgan muhabbat, mehnatsevarlik va qiyinchiliklarni yengib o‘tishdagi mardlik o‘z samarasini berdi: bugun Suhrob oyiga 1000 dollardan ko‘proq maosh oladi va yosh bo‘lishiga qaramay, agar xohlasa, imkonsiz narsa yo‘qligini isbotlaydi.
Izoh (0)