“Siz 3 oyga Telegram Premium’ni yutib oldingiz”: messenjerda firibgarlik holatlari kuzatilmoqda

O‘zbekistonda soxta axborotlarga raddiyalar uchun rasmiy manba — Telegram’dagi “Antifake.uz” kanali messenjerda kuzatilayotgan firibgarlik holatidan fuqarolarni ogohlantirdi.

Unda ta’kidlanishicha, messenjerda go‘yoki mukofot yutib olingani haqidagi xabar bilan birga firibgarlik bilan shug‘ullanuvchi Telegram bot havolasi keltirilgan ma’lumotlar tarqatilmoqda. Bot orqali kelgan xabarda “Siz 3 oyga Telegram Premium’ni yutib oldingiz”, deyilgan va uni go‘yoki faollashtirish uchun havola qoldirilgan.

Obunachilardan kelgan murojaatga ko‘ra, ular ushbu havola ustiga bosganida Telegram hisobiga begona shaxslar tomonidan kirish holati kuzatilgan.

Fuqarolardan bu kabi soxta havolalarga kirmaslikni so‘rab, virtual firibgarlardan ogoh bo‘lishga chaqiramiz. Eslatib o‘tamiz, aholi o‘rtasida yolg‘on axborot tarqatganlik uchun javobgarlik mavjud, — deyiladi manbada.

Telegram profilimga kirishga urinish bo‘ldi. Dastlab kod keldi, 5 minutdan keyin oxiriga yetmagan kirish qayd etildi, degan xabar keldi. Chunki menda 2 etapli xavfsizlik yoqilgandi. Kodni qanaqa olishdi ekan, qiziq. Britaniyadan emish go‘yoki. MI-6 qiziqib qolibdi, shekilli, — deyiladi tvitda.