O‘zbekistonda davlat idoralari, mahalliy hokimiyat organlarining 3200 dan ortiq raqobatga zid qarorlari bekor qilindi. Bu haqda AOKAda Monopoliyaga qarshi kurashish qo‘mitasi raisi o‘rinbosari Farrux Qorabayev ishtirokida o‘tkazilgan brifingda ma’lum qilindi.
Qayd etilishicha, 2021—2022-yillar davomida davlat ishtirokidagi korxonalarni tashkil etish bo‘yicha jami 45 ta murojaatning 33 foizi qo‘mita tomonidan rad etilgan.
Davlat ishtirokidagi korxonalarga asosiy faoliyatidan xos bo‘lmagan qo‘shimcha faoliyat bilan shug‘ullanish va boshqa korxonalarda ulushga ega bo‘lishga taqiq o‘rnatilgan. Natijada davlat ishtirokidagi korxonalar soni so‘nggi ikki yilda qariyb 3000 dan 2100 tagacha (30 foizga) qisqargan.
Monopol korxonalar soni so‘nggi 5 yilda 20 foizga kamaygan va bugungi kunda 90 tani tashkil etmoqda.
Hozirga qadar 1100 dan ortiq normativ-huquqiy hujjatlar loyihalarining raqobatga ta’siri baholangan, shundan qariyb 65 foizida raqobatga zid normalar mavjud ekani aniqlangan.
Monopoliyalar, shu jumladan tabiiy monopoliyalarning 6700 dan ortiq turli raqobatga zid harakatlari bartaraf etilgan. Natijada 42 mingga yaqin tadbirkorning 554 milliard so‘mlik manfaatlari himoya qilingan.
Izoh (0)