Farg‘onada bankdan qarzdor fuqaroning 3 ta Nexia’si xatlandi

Farg‘ona viloyati Marg‘ilon shahrida bir kunda qarzdorning 3 ta Nexia-3 avtomashinalari xatlandi. Bu haqda Majburiy ijro byurosi “Daryo”ga ma’lum qildi.

Qayd etilishicha, MIBning Marg‘ilon shahar bo‘limi tomonidan Marg‘ilon tumanlararo iqtisodiy sudining qaroriga asosan qarzdor O.K. avtotrans MCHJdan undiruvchi “Hamkorbank” foydasiga 127 million 480 ming so‘m kredit qarzni undirish haqidagi ijro hujjati bo‘yicha qarzdor ogohlantirilgan. Shunga qaramay, u bank oldidagi qarzini to‘lamay kelgan.

Davlat ijrochisi tomonidan olib borilgan majburiy ijro harakatlari davomida 5-oktabr kuni qarzdorga tegishli bo‘lgan garovdagi 3 ta Nexia-3 avtotransport vositalari xatlanib, jarima maydoniga joylashtirilgan.

Hozirda xatlangan mulklarni auksion savdolarga qo‘yish choralari ko‘rilmoqda.