Ukraina o‘z hududida harbiy harakatlar ketayotgan bir paytda NATOga qo‘shila olmaydi, dedi Yevropa Ittifoqining ichki bozor bo‘yicha komissari Terri Breton BFM telekanali efirida.
“Ukraina prezidenti Vladimir Zelenskiy Ukrainani NATOga qabul qilishni so‘radi, biroq sizga ma’lumki, alyansga qo‘shilish masalasini mamlakat hududida harbiy harakatlar ketayotgan paytda ko‘tarib bo‘lmaydi. Ukrainada esa jangovar harakatlar davom etmoqda va ular qachon tugashini aytish qiyin”, — dedi Breton.
Yevropa komissarining fikricha, gap “ramziy siyosiy demarsh” haqida ketmoqda.
“Mamlakatda jangovar harakatlar davom etayotgan bir paytda bunday qadamni tashlab bo‘lmaydi”, — deya qo‘shimcha qildi u.
Ukraina NATOga tezlashtirilgan tartibda a’zo bo‘lish uchun ariza topshirgan
Ukraina prezidenti Vladimir Zelenskiy mamlakat hududlarining Rossiya tomonidan anneksiya qilinishi fonida tezlashtirilgan tartibda NATOga a’zo bo‘lish uchun ariza topshirgan edi. Uning so‘zlariga ko‘ra, Kiyev va NATO allaqachon “de-fakto ittifoqchilar”, ammo bu maqom hujjatlashtirilishi kerak. Jarayon davomida Ukraina o‘zi uchun xavfsizlik kafolatlari bo‘yicha muzokaralar olib borish niyatida. NATO bosh kotibi Yens Stoltenberg Ukrainaning alyansga qo‘shilish haqidagi arizasiga izoh berar ekan, NATOga a’zolik to‘g‘risidagi qaror 30 davlatning barchasi tomonidan qabul qilinishi kerakligini, hozirda alyans Ukrainaga Rossiyaning shafqatsiz bosqinidan o‘zini himoya qilish uchun tezkor yordam berishga e’tibor qaratayotganini aytdi. Oq uy jarayonni boshqa vaqtda muhokama qilish kerak, deb hisoblamoqda. Yevropaning o‘ndan ortiq mamlakati Ukrainaning NATOga qo‘shilishini qo‘llab-quvvatlab chiqdi. Bolgariya prezidenti Rumen Radev esa bunga qarshi ekanini bildirdi.
Izoh (0)