Bugun, 6-oktabr kuni Qirg‘iziston parlamenti (Jogorku Kengesh) majlisida deputat Arslanbek Maliyev mamlakat davlat ramzlariga tuzatishlar kiritishni taklif qildi, deb yozadi Asia Plus.
Xususan, xalq deputati bayroqning rangini hamda madhiya so‘zlarini o‘zgartirmoqchi. Maliyevning bayroqning rangi SSSR davrida tanlanganini pesh qilmoqda.
“Tarixga murojaat qiladigan bo‘lsak, qirg‘izlarning bayrog‘i ko‘k rangda bo‘lgan. Shuning uchun biz o‘sha rangni qaytarishimiz kerak. Bunday qonun loyihasi allaqachon tayyorlanmoqda. Madhiyada ham ba’zi so‘zlarni tuzatish zarur. O‘z tarixiy ramzlarimizga qaytish vaqti keldi”, — dedi u.
Avvalroq Arslanbek Maliyev mamlakat nomini o‘zgartirishni taklif etgandi. U taklif qilgan variantlar orasida Qirg‘iz eli, Qirg‘iz kaganati, Qirg‘izjer bor edi.
Bayroq nomini va madhiya so‘zlarini o‘zgartirish masalasi Qirg‘izistonda birinchi marta ko‘tarilayotgani yo‘q.
2011-yildayoq parlament fraksiyasi deputatlari, shuningdek, jamoatchilik vakillaridan iborat komissiya madhiyadagi 5—6 ta so‘z chalg‘ituvchi ma’noga ega, degan xulosaga kelib, ularni ohangdorroq va ma’noliroq so‘zlar bilan almashtirishni taklif etgandi.
Davlat bayrog‘i borasida esa parlament a’zolari guruhi qizil rang agressiya va urush ma’nosiga ega ekanini ma’lum qilgandi.
Izoh (0)