Украина ўз ҳудудида ҳарбий ҳаракатлар кетаётган бир пайтда НАТОга қўшила олмайди, деди Европа Иттифоқининг ички бозор бўйича комиссари Терри Бретон BFM телеканали эфирида.
«Украина президенти Владимир Зеленский Украинани НАТОга қабул қилишни сўради, бироқ сизга маълумки, альянсга қўшилиш масаласини мамлакат ҳудудида ҳарбий ҳаракатлар кетаётган пайтда кўтариб бўлмайди. Украинада эса жанговар ҳаракатлар давом этмоқда ва улар қачон тугашини айтиш қийин», — деди Бретон.
Европа комиссарининг фикрича, гап «рамзий сиёсий демарш» ҳақида кетмоқда.
«Мамлакатда жанговар ҳаракатлар давом этаётган бир пайтда бундай қадамни ташлаб бўлмайди», — дея қўшимча қилди у.
Украина НАТОга тезлаштирилган тартибда аъзо бўлиш учун ариза топширган
Украина президенти Владимир Зеленский мамлакат ҳудудларининг Россия томонидан аннексия қилиниши фонида тезлаштирилган тартибда НАТОга аъзо бўлиш учун ариза топширган эди. Унинг сўзларига кўра, Киев ва НАТО аллақачон «де-факто иттифоқчилар», аммо бу мақом ҳужжатлаштирилиши керак. Жараён давомида Украина ўзи учун хавфсизлик кафолатлари бўйича музокаралар олиб бориш ниятида. НАТО бош котиби Йенс Столтенберг Украинанинг альянсга қўшилиш ҳақидаги аризасига изоҳ берар экан, НАТОга аъзолик тўғрисидаги қарор 30 давлатнинг барчаси томонидан қабул қилиниши кераклигини, ҳозирда альянс Украинага Россиянинг шафқатсиз босқинидан ўзини ҳимоя қилиш учун тезкор ёрдам беришга эътибор қаратаётганини айтди. Оқ уй жараённи бошқа вақтда муҳокама қилиш керак, деб ҳисобламоқда. Европанинг ўндан ортиқ мамлакати Украинанинг НАТОга қўшилишини қўллаб-қувватлаб чиқди. Болгария президенти Румен Радев эса бунга қарши эканини билдирди.
Изоҳ (0)