Namangan viloyatining Norin tumanida Malibu-2 ni sotgan fuqaro uning pulini so‘rashga borganida pichoqlanishi oqibatida vafot etdi. Bu haqda viloyat prokuraturasi matbuot xizmati xabar berdi.
Ma’lum qilinishicha, Norin tumani, “Qozoqovul” MFYda yashovchi D.T. o‘ziga tegishli Malibu-2 ni 2022-yilning iyulida tumanning “Sho‘rariq” MFYda yashovchi S.T. ga o‘zaro kelishuvlariga asosan sotib, shu kuni pulning bir qismini olgan va qolgan qismini keyinchalik berishga kelishgan.
S.T. kelishilgan pulni o‘z vaqtida bermaganidan so‘ng, mashina egasi D.T. pulni olish maqsadida 30-sentabr kuni u bilan uchrashgan vaqtida o‘zaro janjallashib qolishgan. Janjal vaqtida S.T. xo‘jalik pichog‘i bilan D.T. ning hayoti uchun muhim bo‘lgan tana qismiga bir marotaba qasddan urib, tan jarohati yetkazgan.
D.T. shifoxonaga olib borilib zarur tibbiy yordam ko‘rsatilgan bo‘lishiga qaramay, shifoxonada vafot etgan.
1-oktabr kuni Norin tuman prokuraturasi tomonidan S.T. ga nisbatan Jinoyat kodeksining 97-moddasi bilan jinoyat ishi qo‘zg‘atilib, shu kuni unga nisbatan qamoqqa olish tarzidagi ehtiyot chorasi qo‘llanilgan.
Izoh (0)