O‘zbekistonda oilalarning baxtlilik indikatori ishlab chiqilmoqda. Bu haqda AOKAda o‘tkazilgan brifingda “Oila va xotin-qizlar” ilmiy-tadqiqot instituti axborot xizmati rahbari Manija Bahriyeva ma’lum qildi.
Qayd etilishicha, institut tomonidan xalqaro baxtlilik indikatorlarini o‘rganish hamda oilalarning baxtlilik indikatorini ishlab chiqish maqsadida ishchi guruh tarkibi shakllantirildi.
Bunda xalqaro baxtlilik indikatorlari hamda Buyuk Britaniya, Fransiya, Xitoy, Butan Qirolligi, Indoneziya, Malayziyada joriy qilingan indekslar tahlil qilindi. Tahlil va o‘rganishlar natijasida oilalarning baxtlilik indikatorlari aniqlandi. Bunda o‘zbek millatining xarakteri va turmush darajasidan kelib chiqib subyektiv va obyektiv baxt ko‘rsatkichlari inobatga olindi.
Indikatorlarni oilalarning baxtlilik darajasini aniqlashda muhimligi va amaliyotda samaradorligini aniqlash maqsadida Farg‘ona viloyatida tajriba sinov o‘tkazildi. Barcha tahlil va tajriba sinov natijalari asosida oilalarning baxtlilik darajasini belgilovchi indikatorlarni joriy qilish bo‘yicha takliflar tayyorlandi va Vazirlar Mahkamasiga taqdim etildi.
O‘zbekistonda “oilaning baxtlilik indikatori” ishlab chiqilishi haqida 2021-yilning martida “Mahalla va oila” ilmiy-tadqiqot institutining direktori Nodira Egamberdiyeva ham ma’lum qilgandi. Shu maqsadda “Baxtiyor oila” veb-sayti yaratilgandi. Sayt baxtiyor oila qanday bo‘lishi, nima qilish kerakligiga qaratilgan.
Izoh (0)