Davlat bojxona qo‘mitasi tomonidan Toshkent shahridagi zavodlardan birida noqonuniy muomaladan olib qo‘yilgan tamaki mahsulotlarini yo‘q qilish tadbiri o‘tkazildi. Bu haqda “Daryo” muxbiri xabar bermoqda.
Ma’lum qilinishicha, joriy yilning 23-iyun kuni Toshkent viloyati bojxona boshqarmasi tezkor tuzilmalari tomonidan DXX xodimlari bilan birgalikda Ohangaron tumanida o‘tkazilgan tezkor tadbirda avvaldan kuzatuvga olingan Hyundai Porter II rusumli yuk avtomashinasi to‘xtatilib, xolislar ishtirokida ko‘zdan kechiriladi. Avtomashina yukxonasida 3 ta nomdagi, qiymati 175 million so‘mlik 25 ming quti noqonuniy tamaki mahsulotlari borligi aniqlanadi. Ashyoviy dalil tariqasida olingan bu mahsulotlar xorijda ishlab chiqarilgan bo‘lib, raqamli markirovka kodlariga ega bo‘lmagan hamda aksiz markalari bilan qadoqlanmagan.
Holat yuzasidan jinoyat ishi qo‘zg‘atilib, 2022-yilning 6-sentabr kuni jinoyat ishlari bo‘yicha Ohangaron tuman sudi tomonidan ushbu tamaki mahsulotlarini yo‘q qilish yuzasidan hukm o‘qilgan. Yo‘q qilish tadbirida ushbu 25 ming quti tamaki mahsulotlari ishtirokchilar guvohligida maxsus uskunada maydalanib, yoqib yuborildi.
Davlat bojxona qo‘mitasi boshqarma boshlig‘i Akromjon Ahlimirzayev tamaki kontrabandasiga qarshi kurashish masalasida fikr bildirdi.
“Noqonuniy tamaki mahsulotlarni chegaradan olib o‘tilishiga va sotilishiga qarshi kurashish bojxona oldidagi muhim vazifalardan sanaladi. Afsuski, ichki bozorimizda bu kabi arzon va sifatsiz mahsulotlarga talab bor. Buni inkor qilib bo‘lmaydi. Albatta, bu yo‘nalishda bojxona nazorati kuchaytirilgan. Noqonuniy tamaki savdosi uchun katta jarimalar belgilangan. Bunga qarshi keskin kurash olib bormoqda. Lekin bu muammoni faqatgina jazolash bilan yechish qiyin. Xalqimizga masalaning mohiyatini to‘g‘ri yetkazib berishimiz muhim. Jamiyat kontrabanda mahsulotlar savdosiga murosasiz bo‘lishi kerak. Chekish inson salomatligiga zarar. Tarkibi kafolatlanmagan tamakini iste’mol qilish esa sog‘liqni ikki karra xavfga qo‘yish bilan barobar”, – dedi mutaxassis.
Tadbirda ma’lum qilinishicha, bojxona organlari tomonidan joriy yilning 9 oyi mobaynida noqonuniy tamaki mahsulotlari bilan bog‘liq jami 269 ta huquqbuzarlik holatlari aniqlangan bo‘lib, ular bo‘yicha 1 million 458 ming 736 quti tamaki mahsulotlari ushlab qolingan. Mazkur tamaki mahsulotlarining umumiy qiymati salkam 17,8 milliard so‘mni tashkil etadi.
Bojxona organlari tomonidan 60 dan ortiq holatda aybdor shaxslarga nisbatan jinoyat ishlari qo‘zg‘atilib, tergov organlariga yuborilgan.
Shuningdek, 175 ta huquqbuzarlik holatlari bo‘yicha ma’muriy ishlar yuritilib, ko‘rib chiqish uchun jinoyat ishlari bo‘yicha sudlarga yuborilgan.
Davlat bojxona qo‘mitasi surishtiruvchisi Dilshod Maqsudov noqonuniy tamaki mahsulotlarini yo‘q qilishning qonuniy asoslariga to‘xtaldi.
Dilshod MaqsudovFoto: “Daryo”
“Vazirlar Mahkamasining 2009-yildagi “Davlat daromadiga o‘tkaziladigan mol-mulkni olib qo‘yish, sotish yoki yo‘q qilib tashlash tartibi to‘g‘risida”gi qarori bilan tasdiqlangan nizomning 7-bobida sud qaroriga ko‘ra musodara qilingan tamaki mahsulotlarini yo‘q qilib tashlash tartibi belgilangan. Unga ko‘ra, musodara qilingan tamaki mahsulotlarini yo‘q qilish ishlarini tashkillashtirish davlat ijrochisi tomonidan amalga oshiriladi”, – dedi u.
Izoh (0)