Sud ishiga aralashish deb topilgan Xalq deputatlari Konimex tumani kengashining qarori bekor qilindi

Jinoyat ishlari bo‘yicha  tuman sudi raisiga bajarish uchun bir qator vazifalar belgilab berilgan Xalq deputatlari Konimex tuman kengashining qarori bekor qilindi. Bu haqda Sudyalar oliy kengashi axborot xizmati xabar bermoqda.

Nima bo‘lgan edi?

Xalq deputatlari Konimex tumani kengashi joriy yilning 5-avgust kuni jinoyat ishlari bo‘yicha tuman sudi raisiga bir qator vazifalar yuklatilgan qarorni qabul qilgan edi.

Qarorda sud raisiga OAV bilan ishlash, murojaatlarni vaqtida ko‘rib chiqish, odil sudlovni ta’minlash kabi bir qator vazifalar ko‘rsatib o‘tilgan.

Sudyalar oliy kengashi mazkur qaror (xususan, uning 2-bandi) sud ishlariga aralashish, sudya daxlsizligiga ta’sir o‘tkazishi ehtimolini yaqqol yuzaga keltirgan deb topgan va Bosh prokuraturaga taqdimnoma kiritgan.

“Xalq deputatlari Konimex tuman kengashining qarori o‘rganilib, uni bekor qilish haqida prokuratura tomonidan protest kiritildi. Yakunda protest qanoatlantirilib, Xalq deputatlari Konimex (Navoiy viloyati) tuman kengashining yuqorida qayd etilgan qarori 2-bandi  bekor qilindi”, — deyiladi Sudyalar oliy kengashi axborotida.

“Sudlar to‘g‘risida”gi qonunning 41-moddasida fuqarolik ishlari bo‘yicha tumanlararo, tuman, shahar sudi, jinoyat ishlari bo‘yicha tuman, shahar sudi, tumanlararo, tuman, shahar iqtisodiy sudi raisi sudning fuqarolar huquqlari va erkinliklarini, shuningdek, yuridik shaxslarning huquqlari va qonun bilan qo‘riqlanadigan manfaatlarini sud orqali himoya qilishni amalga oshirishga doir faoliyati to‘g‘risida tegishli xalq deputatlari Kengashiga bir yilda kamida bir marta axborot taqdim etishi qayd etilgan. Sud raislarining axboroti muhokama etilmaydi, balki ma’lumot uchun qabul qilinadi.