3-oktabr kuni Oliy Majlis Qonunchilik palatasida “Milliy tiklanish” demokratik partiyasi fraksiyasining navbatdagi yig‘ilishi bo‘lib o‘tdi. Bu haqda quyi palata axborot xizmati xabar qildi.
Qayd etilishicha, unda fraksiya a’zolari “Davlat boji to‘g‘risida’gi O‘zbekiston Respublikasi qonuniga qo‘shimcha kiritish haqida”gi qonun loyihasini birinchi o‘qishda ko‘rib chiqqan.
Ta’kidlanishicha, 2020-yilda ma’muriy sudlar tomonidan davlat xizmatlarini ko‘rsatishga vakolatli idoralarning qarorlarini haqiqiy emas deb topish, ularning harakatini qonunga xilof deb topishga doir 6 920 ta ish ko‘rib chiqilgan. Ularning 5 257 tasi qanoatlantirilgan. 2021-yilda esa ushbu raqamlar 5 761 tani tashkil etib, shulardan 3 538 tasi sudlar tomonidan qanoatlantirilgan.
Ma’muriy sudlar tomonidan ushbu toifadagi nizolar bo‘yicha ko‘rib chiqilgan ishlarning aksariyati aynan davlat xizmatlarini ko‘rsatishga vakolatli bo‘lgan mansabdor shaxslarning harakati yuzasidan berilgan arizalarni tashkil etmoqda.
Qonun loyihasi bilan fuqarolar davlat organlari va boshqa tashkilotlar tomonidan davlat xizmatlarini ko‘rsatish bilan bog‘liq qarorlar, harakatlar (harakatsizlik) ustidan sudlarga murojaat qilish chog‘ida belgilangan stavkaning 50 foizi miqdorida davlat boji to‘lashi nazarda tutilmoqda.
Davlat xizmatlarini ko‘rsatish sohasida jismoniy va yuridik shaxslarning buzilgan huquq va manfaatlari sudlar orqali himoya qilinishini kengaytirish, ularning odil sudlovga erishish darajasini oshiradi. Deputatlar qonun loyihasi yuzasidan bir qator takliflar berib, uni qo‘llab-quvvatlagan.
Yig‘ilishda, shuningdek, bir qator qonun loyihalari hamda fraksiya faoliyatiga oid masalalar ko‘rib chiqilib, tegishli qaror qabul qilingan.
Izoh (0)