“O‘zatom” agentligi bosh direktori Jo‘rabek Mirzamahmudov va AEXA bosh direktori Rafael Grossi o‘rtasida uchrashuv bo‘lib o‘tdi, deb xabar qilmoqda “Dunyo” axborot agentligi.
Qayd etilishicha, uchrashuvda Rafael Grossi 2022-yilda kuzatilgan ikki tomonlama hamkorlikning o‘suvchanligini yuqori baholagan. Bosh direktor AEXA departamentlarining respublika tashkilotlari bilan o‘zaro hamkorligi haqida yaxshi ma’lumotga ega ekanini qayd etgan.
Uning aytishicha, O‘zbekiston o‘z atom energetikasini yaratish yo‘liga o‘tgan davlat sifatida doimo uning diqqat-e’tiborida turibdi. Shu munosabat bilan u agentlik O‘zbekistonga yadro infratuzilmasini rivojlantirish va milliy iqtisodiyotning turli tarmoqlariga yadro texnologiyalarini joriy etishda har tomonlama ko‘mak ko‘rsatishga tayyor ekanini ma’lum qilgan.
Rafael Grossi Islom taraqqiyot banki ishtirokida Respublika ixtisoslashtirilgan onkologiya va radiologiya ilmiy-amaliy tibbiyot markazini zamonaviy uskunalar bilan jihozlash masalasiga alohida to‘xtalgan. Bosh direktor ushbu loyiha uning shaxsiy e’tibori va nazoratida ekanini ta’kidlagan.
Ta’kidlanishicha, agentlik uskunalarni xarid qilishni muvofiqlashtirish va nazorat qilishni o‘z zimmasiga olishi mumkin. Ayni paytda agentlik O‘zbekiston bilan yadro tibbiyotida qo‘llaniladigan o‘ziga xos asbob-uskunalardan foydalanish va ularga xizmat ko‘rsatish bo‘yicha tibbiy mutaxassislar malakasini oshirish sohasida strategik hamkorlikni yo‘lga qo‘ymoqda.
O‘z navbatida, O‘zbekiston tomoni Rafael Grossiga ko‘rsatilayotgan e’tibor uchun minnatdorlik bildirdi va hukumat nomidan O‘zbekiston AEXAning yadroviy xavfsizlikni ta’minlash bo‘yicha talab va tavsiyalariga rioya qilish bo‘yicha xalqaro majburiyatlarga sodiq ekanini qayd etgan.
Izoh (0)