Toshkent shahrining Yangihayot tumanida birinchi tez tibbiy yordam bo‘limi ish boshladi. Bu haqda Yangihayot tumani hokimligi axborot xizmati “Daryo”ga ma’lum qildi.
Ma’lum qilinishicha, bunga qadar tumanda tez tibbiy yordam bo‘limi bo‘lmagan. Chaqiruvlarga shahardagi boshqa tuman tez tibbiy yordam bo‘limlaridan ko‘mak berib turilgan.
“Tuman tez tibbiy yordam bo‘limi internet, telefon va radioaloqa tizimlari bilan ta’minlangan. Hajmi jihatdan shahardagi eng katta tez tibbiy yordam stansiyalaridan biri hisoblanadi”, — deyiladi hokimlik axborotida.
Tez tibbiy yordam bo‘limiga 11 ta tez tibbiy yordam mashinasi topshirilgan. Shuningdek, tumanga ajratilgan 1 milliard so‘m mablag‘ evaziga 2 ta Volkswagen rusumli tez tibbiy yordam mashinasi xarid qilingan.
Mazkur shoshilinch tez tibbiy yordam stansiyasi 1 kunda 300-350 nafar bemorning chaqiriqlariga javob berish quvvatiga ega.
Izoh (0)