“Javob xati atayin kechiktirilgan”. “Agrobank”ning Qashqadaryo viloyat boshqarmasi sudyalarni adolatsizlikda ayblamoqda

“Agrobank”ning Qashqadaryo viloyati boshqarmasi mas’ullari sudyalarni adolatsizlikda ayblamoqda. Bu haqda “Daryo”ga bank huquqshunosi Oybek Abdurashidov ma’lumot berdi.

Axborot berilishicha, “Agrobank” ATB Kitob filiali tomonidan Jinoyat ishlari bo‘yicha Qashqadaryo viloyat apellyatsiya instansiyasi sudlov hay’atiga 2022-yil 6-sentabr kuni Jinoyat ishlari bo‘yicha Shahrisabz shahar sudining 2022-yil 2-avgust kunidagi hukmiga nisbatan apellyatsiya shikoyati va muddatni tiklash bo‘yicha ariza bilan murojaat qilingan. Biroq, javob xati viloyatdan emas, Jinoyat ishlari bo‘yicha Shahrisabz shahar sudi tomonidan yuborilgan.

Jinoyat ishlari bo‘yicha Shahrisabz shahar sudi shu kunning o‘zida muddatni tiklash to‘g‘risidagi ariza rad etilgani haqida javob xati tayyorlab, atayin kechiktirib, “Agrobank”ATBning Kitob filialiga yuborgan. Javob xati bankning Kitob filialiga 2022-yil 13-sentabr kunida kelib tushgan. Javob xatida “JIB Shahrisabz shahar sudi raisi nomiga yozgan arizangiz o‘rganib chiqildi”, deyilgan. Aslida, bankning Kitob filiali tomonidan JIB Shahrisabz shahar sudi raisi nomiga emas balki, Jinoyat ishlari bo‘yicha Qashqadaryo viloyat apellyatsiya instansiyasi sudlov hay’atiga ariza bilan murojaat qilingan, — deydi bank yuristi Oybek Abdurashidov.

Yuristning tushuntirishicha, amaldagi qonun talablariga ko‘ra, fuqaroviy da’vogar “Agrobank” ATB Kitob filiali tomonidan apellyatsiya shikoyati berish muddatlari o‘tkazilmagan.

Hukmning sanksiya qismida fuqaroviy da’vogar hukmni olgan kundan e’tiboran 20 kun muddat ichida apellyatsiya shikoyati berish huquqiga ega ekanligi ko‘rsatib o‘tilgan. Shu holatda, ya’ni filial hukmni 2022-yil 26-avgust kuni olganligini inobatga olsak, 10 kunlik muddat ichida apellyatsiya shikoyatini bergan hisoblanadi. Agarda apellyatsiya shikoyati muddati o‘tgan deb hisoblansa, ya’ni hukm fuqaroviy da’vogarga kelib tushgan kungacha 20 kunlik muddat o‘tgan deb hisoblanmaydi, — deydi u.

Ma’lum qilinishicha, mazkur jinoyat ishining sud muhokamasida sud raisi sudlanuvchiga uning ayblov qaroriga qo‘yilgan 158 million 935 ming so‘m zararni sud muhokamasi davomida to‘lasa, garov sifatida qo‘yilgan mulkini taqiqdan chiqarish to‘g‘risida qaror qabul qilishini aytgan. Biroq, dastlabki tergov davomida tergovchi tomonidan yetkazilgan zarar deb faqatgina kreditning asosiy summasi inobatga olingan. Ushbu kreditga hisoblangan foiz va penya to‘lovlari inobatga olinmagan.

Sudda sudya yetkazilgan zarar miqdori va o‘sha paytda bank filialidan YATT “Nazarov Shahzod Erkin o‘g‘li”ning qarzdorligi to‘g‘risidagi ma’lumotni talab qilmagan. Va bankka yetkazilgan zarar to‘liq so‘ndirilmasdan ehtiyot chorasi sifatida qo‘llanilgan qamoq bekor qilingan, — deydi yurist.

Aniqlashtirilishicha, YATT “Nazarov Shahzod Erkin o‘g‘li”ga ajratilgan kredit bo‘yicha jami 233 million 410 ming so‘m qarzdorlik mavjud bo‘lgan.

Jinoyat ishlari bo‘yicha Shahrisabz shahar sudining 2022-yil 2-avgust kuni chiqarilgan hukmiga ko‘ra, “YATT Nazarov Shahzod Erkin o‘g‘li” tomonidan depozit hisob raqamiga 158 million 935 ming so‘m to‘langan va ushbu mablag‘ “Agrobank” ATB Kitob filiali hisob raqamiga o‘tkazilgan. 233 million 410 ming so‘mning 158 million 935 ming so‘mi to‘langan bo‘lsa-da, 74 million 475 ming so‘mlik qarzdorlik yopilmay qolgan. Sudya shuni inobatga olmagan va bank manfaatlariga zid ravishda qaror qabul qilgan, — deydi bank huquqshunosi.

“Daryo” bank mas’ullari keltirgan ma’lumotlarni Qashqadaryo viloyat sudiga taqdim qilib, holatga izoh so‘raganda sud axborot xizmati bankning apellyatsiya shikoyati rasmiylashtirilayotganini ma’lum qildi.

“Agrobank” ATB Kitob filiali boshqaruvchisining 2022-yil 6-sentabrdagi arizasida Jinoyat ishlari bo‘yicha Shahrisabz shahar sudining 2022-yil 2-avgust kunidagi Sh.Nazarovga nisbatan chiqarilgan hukmining garov ta’minoti sifatida qo‘yilgan Kitob tumanida joylashgan X.Usmonovaga tegishli “Savdo do‘koni va non mahsulotlari ishlab chiqarish sexi” binosiga qo‘yilgan taqiqni bekor qilish qismidan norozi bo‘lib, apellyatsiya shikoyati berish muddatini tiklab berish so‘ralgan. JIB Shahrisabz shahar sudi tomonidan 2022-yil 6-sentabr kuni Jinoyat protsessual kodeksining 497-4-moddasi (hukm ustidan apellyatsiya shikoyatlari va protestlari berish muddati) talabidan kelib chiqib, apellyatsiya tartibida berilgan shikoyati bo‘yicha shikoyat berish muddatidan o‘tkazib berilgani, muddatni tiklash uchun uzrli sabab bo‘ladigan asoslar keltirilmaganligi sababli shikoyat rad etilgan.

“Agrobank” ATB Kitob filiali boshqaruvchisining 2022-yil 3-oktabrdagi apellyatsiya shikoyati berish muddatini tiklab berish haqidagi iltimosnomasi Jinoyat ishlari bo‘yicha Shahrisabz shahar sudi tomonidan ko‘rib chiqilib, shikoyat berish muddatini tiklash uchun yetarli asoslar keltirilganligi sababli iltimosnoma qanoatlantirilib, hozirda apellyatsiya shikoyati rasmiylashtirilmoqda, — deyiladi viloyat sudi axborot xizmati ma’lumotida.

“Daryo” voqealar rivojini kuzatishda davom etadi.