Farg‘onalik haydovchi avtomashinasini jarima maydoniga olib kirgan YPX inspektoriga sovuq qurol o‘qtaldi. Huquqbuzar ushbu harakati uchun 15 sutkaga qamaldi. Bu haqda “Daryo”ga viloyat IIB Axborot xizmati ma’lum qildi.
Aniqlanishicha, 2022-yilning 30-sentabr kuni Farg‘ona viloyati IIB yo‘l-patrul xizmati inspektorlari va viloyat Transport boshqarmasi xodimlari hamkorligida tadbir o‘tkazilgan. Bag‘dod tumani Qirqvolida qishlog‘i hududida olib borilgan tadbirda YPX inspektori X.A. Damas avtomashinasini to‘xtatgan. Shunda haydovchi A.A. tegishli hujjatlarsiz odam tashish bilan shug‘ullangani aniqlanib, unga nisbatan ma’muriy bayonnoma rasmiylashtirilgan va avtomashina vaqtincha saqlash uchun jarima maydonchasiga olib kirilgan.
Haydovchi A.A. xizmatni davom ettirayotgan YPX inspektorining oldiga kelib, baqir-chaqir qilib, o‘zida bo‘lgan pichoqni ochiqdan-ochiq namoyish qilgan. Inspektor X.A. undan pichoqni olib qo‘yishga erishgan.
Mazkur holat yuzasidan Bag‘dod tuman IIB tomonidan tergovga qadar tekshiruv harakatlari olib borilib, to‘plangan hujjatlar jinoyat ishlari bo‘yicha Bag‘dod tumani sudiga taqdim etilgan.
Sud tomonidan fuqaro A.A. Ma’muriy javobgarlik to‘g‘risidagi kodeksning 183-moddasi (mayda bezorilik), 185-2-moddasi 1-qismida (sovuq qurolni yoki sovuq qurol sifatida foydalanilishi mumkin bo‘lgan ashyolarni olib yurish) ko‘rsatilgan huquqbuzarlikni sodir etganlikda aybdor deb topilib, unga nisbatan 15 sutka ma’muriy qamoq jazosi tayinlandi.
Izoh (0)