Фарғоналик ҳайдовчи автомашинасини жарима майдонига олиб кирган ЙПХ инспекторига совуқ қурол ўқталди. Ҳуқуқбузар ушбу ҳаракати учун 15 суткага қамалди. Бу ҳақда «Дарё»га вилоят ИИБ Ахборот хизмати маълум қилди.
Аниқланишича, 2022 йилнинг 30 сентябрь куни Фарғона вилояти ИИБ йўл-патруль хизмати инспекторлари ва вилоят Транспорт бошқармаси ходимлари ҳамкорлигида тадбир ўтказилган. Бағдод тумани Қирқволида қишлоғи ҳудудида олиб борилган тадбирда ЙПХ инспектори Х.А. Damas автомашинасини тўхтатган. Шунда ҳайдовчи А.А. тегишли ҳужжатларсиз одам ташиш билан шуғуллангани аниқланиб, унга нисбатан маъмурий баённома расмийлаштирилган ва автомашина вақтинча сақлаш учун жарима майдончасига олиб кирилган.
Ҳайдовчи А.А. хизматни давом эттираётган ЙПХ инспекторининг олдига келиб, бақир-чақир қилиб, ўзида бўлган пичоқни очиқдан-очиқ намойиш қилган. Инспектор Х.А. ундан пичоқни олиб қўйишга эришган.
Мазкур ҳолат юзасидан Бағдод туман ИИБ томонидан терговга қадар текширув ҳаракатлари олиб борилиб, тўпланган ҳужжатлар жиноят ишлари бўйича Бағдод тумани судига тақдим этилган.
Суд томонидан фуқаро А.А. Маъмурий жавобгарлик тўғрисидаги кодекснинг 183-моддаси (майда безорилик), 185-2-моддаси 1-қисмида (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш) кўрсатилган ҳуқуқбузарликни содир этганликда айбдор деб топилиб, унга нисбатан 15 сутка маъмурий қамоқ жазоси тайинланди.
Изоҳ (0)