Andijonda sodir etilgan mudhish qotillik yuzasidan mahalla mas’ullari va hudud noziriga nisbatan xizmat tekshiruvi tayinlangan — Bosh prokuratura

Andijon viloyatida er 22 yoshli ayoli, uning onasi va ukasini o‘ldirgani yuzasidan mahalla raisi, xotin-qizlar bo‘yicha faollar hamda uchastka inspektoriga nisbatan xizmat tekshiruvi tayinlangan. Bu haqda 3-oktabr kuni AOKAda bo‘lib o‘tgan matbuot anjumanida Bosh prokuratura bo‘lim boshlig‘i O‘ktam O‘tayev aytib o‘tdi, deya xabar bermoqda “Daryo” muxbiri.

O‘ktam O‘tayevning ma’lum qilishicha, Andijon va Toshkent viloyatida oilaviy nizolar ortidan mudhish jinoyatlar sodir etilishiga mas’ul idora vakillarining e’tiborsizligi sabab bo‘lgan.

“Andijon voqeasini oladigan bo‘lsak: er-xotin o‘rtasidagi urushni nahotki mahalla bilmagan bo‘lsa, nahotki, uchastka inspektori bilmagan bo‘lsa? Nahotki, uni notinch oila sifatida biz nazoratga olmagan bo‘lsak, degan haqli savol tug‘iladi. Mana shu holatlar bo‘yicha prokuratura organlari tomonidan mahalla va oilani qo‘llab-quvvatlash vazirligi vakillariga nisbatan, mahalla raisi, xotin-qizlar bo‘yicha faollarga nisbatan xizmat tekshiruvi tayinlandi. Shuningdek, ichki ishlar organlarini uchastka inspektoriga nisbatan xizmat tekshiruvi tayinlandi”, — dedi Bosh prokuratura vakili.

U yuqorida qayd etilgan voqealarga bepisand munosabatda bo‘lgan mas’ullarga Prezident Shavkat Mirziyoyevning so‘zlarini keltirib o‘tdi.

“Bunaqa loqaydsizlik davlatimiz rahbarining tabiri bilan aytganda, “Bizni islohotlarimizni amalga oshirmaslikdagi dushman bizni ichimizda”. Ya’ni bu loqayd, bugungi bo‘layotgan islohotlarga e’tiborsiz bo‘layotgan odamlar hisoblanadi”, — dedi O‘ktam O‘tayev.

Andijon va Toshkent viloyatida nima bo‘lgan edi?

Andijon viloyatining Izboskan tumanida sentabr oyi boshida “To‘rtko‘l” MFY Xotira ko‘chasida yashovchi fuqaro A.A. oilaviy kelishmovchiliklar tufayli turmush o‘rtog‘i R.Sh., qaynonasi R.M. va qaynukasi R.X. bilan janjallashib, ularga pichoq bilan tan jarohati yetkazgan. Oqibatda turmush o‘rtog‘i va qaynonasi hodisa joyida, qaynukasi R.X. shifoxonada vafot etgan.

Toshkent viloyatining Quyi Chirchiq tumanida er rashk sabab xotinini xususiy uy bog‘chasidagi bolalar ko‘z o‘ngida bo‘g‘ib, kaltaklaydi. U oradan ko‘p o‘tmay mast holda ayolining ota uyiga borib, xotinini pichoqlab, o‘ldiradi.