Xonanda Shakira ilk bor Jerar Pike bilan ajrashganiga izoh berdi

2022-yilning iyun oyida xonanda Shakira 12 yillik munosabatlaridan so‘ng “Barselona” himoyachisi Jerar Pike bilan ajrashishini ma’lum qildi. Ularning ajrimiga futbolchining xiyonati sabab bo‘lgan. Oradan biroz vaqt o‘tib, Shakira sukunatni buzishga qaror qildi va bu mavzuga birinchi marta o‘zi izoh berdi, deb yozadi “Lisa.ru”.

“Men sukut saqladim va hammasini yengishga harakat qildim. Ha, hozir bu haqda gapirish men uchun juda qiyin. Ayrilishimiz xalqning ko‘z o‘ngida yuz berdi, shuning uchun bu nafaqat menga, balki bolalarimizga ham og‘ir bo‘ldi. Paparatssilar meni uyimda 24/7 kuzatib turdi. Ulardan yashirinadigan joyim yo‘q, oddiy oiladek bog‘da ham sayr qila olmaymiz.

Bilasizmi, men ajrashishimizning tafsilotlarini oshkor qilishga tayyor emasman, lekin aytmoqchimanki, men sevgimiz uchun o‘zimni va karyeramni qurbon qildim. Buning sharofati bilan farzandlarim haqiqiy onaga ega bo‘ldi. Mening ular bilan munosabatim juda ajoyib. Aytishim mumkin bo‘lgan narsaning bori shu”, — dedi yulduz.

Eslatib o‘tamiz, Shakira va Jerar Pike 2010-yilgi futbol bo‘yicha jahon chempionati vaqtida tanishgan. Sobiq sevishganlar bir kunda, 10 yil farq bilan tug‘ilgan. Ular farzandi Sasha va Milan tug‘ilganiga qaramay, juftlik oilaviy munosabatlarini qonuniylashtirmagan. Ular fuqarolik nikohida yashagan.