Хитой олимлари дунёда биринчи бўлиб Арктика бўриси (Cанис лупус арcтос)ни клонлаштирди, деб хабар бермоқда «РИА Новости». Бўри боласининг дунёга келганини СиноГене биотехнология компанияси бош директори Ми Сзидун 20 сентябрь куни махсус ташкил қилинган тақдимот чоғида эълон қилди.
«Юз кун аввал дунёдаги биринчи клонлаштирилган Арктика бўриси дунёга келди, бу муҳим кунга гувоҳ бўлиш учун биз матбуот анжуманини ташкил қилдик, ва ўйлайманки, бу нафақат СиноГене ва Харбин қутб паркининг муваффақияти, балки ёввойи ҳайвонларнинг қирилиб бораётган турларини ҳимоя қилиш ва кўпайтиришга урнишимиз ва ушбу соҳадаги янгилик бўлди», — деди ташкилот раҳбари.
Нашр маълумотларига кўра, бўри боласи 2022 йил 10 июнь куни Пекиннинг Чанпин туманида жойлашган СиноГене лабораториясида дунёга келган. Жониворга суррогат она сифатида бигл зотидаги ит танланган. Соматик ҳужайраларни олимлар Майа лақабли урғочи ёввойи Арктика бўрисининг тери намунасидан олган. У 2006 йилда Хитойга Канададан келтирилганди.
Ми Сзидун қайд этишича, клонлаштириш жараёни ҳайвонлар учун хавфсиз бўлиб, уларнинг саломатлигига таъсир ўтказмайди. Клонларнинг ҳаёти давомийлиги ҳам оддий ҳайвонларникидан фар қилмайди. Компания бош директори яқин кунларда яна бир клонлаштирилган бўри дунёга келишини ҳам маълум қилди.
Нашр эслатишича, аввалроқ жанубий кореялик олимлар иккита бигл зотли кучукларни клонлаштирган, бунинг учун генларни таҳрирлаш йўли билан ўзгартирилган тери ҳужайраларидан фойдаланилган эди.
Изоҳ (0)