Afg‘oniston poytaxtidagi “Kaj” ta’lim markazida imtihon chog‘ida portlash yuz berdi, deb xabar qiladi Al Jazeera hukumatdagi manbasiga tayanib. Kobul politsiyasi Xolid Zadran portlash sodir bo‘lganini tasdiqladi.
Telekanal ma’lumotlariga ko‘ra, ta’lim markazida xudkush terrorchi tomonidan terakt sodir etilgan, oqibatda 32 kishi halok bo‘lib, yana 40 kishi yaralangan.
Hujum qilgan shaxs dastlab qo‘riqchini otib tashlagan, so‘ng sinfxonaga kirib, o‘quvchilar orasida o‘z xudkushlik kamarini portlatgan.
Ta’lim markazi shaharning g‘arbiy qismidagi Dashti Barchi tumanida joylashgan, u yerda asosan hazora shialar yashaydi.
Bu Kobulning ushbu tumanidagi ta’lim markazlari hujumga uchrashi bilan bog‘liq birinchi holat emas. Chunonchi, aprel oyida bu tumandagi o‘rta maktabga hujum oqibatida olti kishi halok bo‘lgandi. 2021-yil mayida qizlar maktabida bomba portlashi tufayli 85 kishi qurbon bo‘lgandi. 2020-yil mayida esa jangarilar Dashti Barchidagi tug‘uruqxonada 24 nafar ayol va bolalarni o‘ldirgandi.
Afg‘onistonda hazora shialaridan iborat ozchilik tez-tez terrorchilik hujumlari nishoniga aylanadi va ISHID tomonidan ham, “Tolibon” tomonidan ham ta’qiblarga uchraydi.
23-sentabr kuni Kobulning diplomatik muassasalar va hukumat binolari joylashgan “yashil hududi”da Vazir Akbar Xon masjidida portlash yuz bergandi.
Izoh (0)