30-sentabr kuni 15:00 da (Toshkent vaqti bilan 17:00) Kremlda yangi hududlarning Rossiya tarkibiga qo‘shilishi haqidagi shartnomalar imzolanadi. Bu haqda prezident matbuot kotibi Dmitriy Peskov jurnalistlarga ma’lum qildi, deb yozadi “RBK”.
Uning so‘zlariga ko‘ra, Georgiy zalidagi tadbirda prezident yangi hududlar rahbarlari bilan uchrashuv o‘tkazadi. Bundan tashqari, u uzun nutq bilan chiqish qiladi.
Rossiya prezidenti Vladimir Putin LXDR, DXR hamda Xerson va Zaporojye viloyatlarining bosib olingan hududlari RF tarkibiga qo‘shilganini 30-sentabr kuni e’lon qilishi mumkinligi avvalroq ma’lum bo‘lgan edi.
Shundan keyin parlamentning ikkala palatasi ham Putin tomonidan imzolangan tegishli qonunlarni ma’qullashi mumkin. Davlat dumasi spikeri Vyacheslav Volodin ma’lum qilishicha, Rossiya parlamentining quyi palatasi 3-oktabr kuni rejadan tashqari majlisiga yig‘iladi, bunday qaror aynan nima bilan bog‘liqligiga u aniqlik kiritmadi.
Rossiya parlamentining yuqori palatasi Federatsiya kengashi esa anneksiyani 4-oktabr kungi majlisda tasdiqlashi mumkin. Spiker Valentina Matviyenko bu masalada rejadan tashqari yig‘ilish o‘tkazilmasligini ma’lum qildi.
28-sentabr kuni LXR va Xerson viloyati rahbarlari Putinga murojaat qilib, Rossiya tarkibiga qabul qilishni so‘ragan edi.
Referendumlar
Rossiya tarkibiga kirish haqidagi referendumlarda ovoz berish 27-sentabr kuni yakunlandi. 28-sentabr kuni ertalab Donbass saylov komissiyalari ovozlarning 100 foizi ko‘rib chiqilganidan keyin referendumlar natijalarini e’lon qildi. Ularning aytishicha, LXR saylovchilarining 98,42 foizi, DXR elektoratining 99,23 foizi, Zaporojye va Xerson viloyatlari bosib olingan hududlari aholisining esa tegishli ravishda 93,1 foizi va 87,05 foizi Rossiya tarkibiga qo‘shilishni yoqlab ovoz bergan.Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Kanada bosh vaziri referendumlar tufayli Rossiyaga qarshi yangi sanksiyalar kiritilishini e’lon qildi. Zelenskiy esa referendumlar tan olinsa, Putin bilan muzokaralar o‘tkazmasligini aytdi.
Izoh (0)