Shimoliy Koreya Yapon dengiziga qarata ikkita ballistik raketa uchirdi, deb xabar bermoqda Deutsche Welle.
Janubiy Koreya harbiylari ma’lum qilishicha, ular Pxenyanning Sunan tumanidan mamlakat sharqiy suvlariga qarata uchirilgan ikkita kichik masofali ballistik raketalarni aniqlagan. Ta’kidlanishicha, raketalar parvozi AQSH vitse-prezidenti Kamala Xarrisning Janubiy Koreyaga tashrifi arafasida amalga oshirilgan.
“Harbiylarimiz monitoring va kuzatuvni kuchaytirib, AQSH bilan yaqin koordinatsiyada eng yuqori shaylikni saqlab turibdi”, — deyiladi Seul shtab boshliqlari birlashgan qo‘mitasi bayonotida.
Qo‘mita ma’lumotlariga ko‘ra, raketalar 28-sentabr kuni mahalliy vaqt bilan 18:10 da (Toshkent vaqti bilan 14:10) uchirilgan. Ular qariyb 360 km uzoqlikka uchib borib, 30 km balandlikkacha chiqqan va soatiga 7450 km tezlikka erishgan.
Yaponiya qirg‘oq soqchilik xizmati ham raketalar uchirilgani haqida xabar berdi va ushbu hududda bo‘lgan kemalarni ogoh bo‘lishga chaqirdi. Yaponiya mudofaa vaziri Tosiro Ino raketalar uchirilishini “nomaqbul” deb atadi.
“Shimoliy Koreyaning ko‘p bora ballistik raketalarni uchirishni ham o‘z ichiga oluvchi ketma-ket harakatlari Yaponiya, mintaqa va xalqaro hamjamiyat tinchligi va xavfsizligiga tahdid soladi”, — dedi u.
AQSH Hind-Tinch okeani qo‘mondonligi aniqlangan raketalar Amerika xodimlari yoki hududiga bevosita xavf tug‘dirmasligini ma’lum qildi.
“Biz avvalgidek, KXDRga nisbatan diplomatik yondashuv tarafdorimiz va KXDRni muloqotga chaqiramiz”, — deyiladi AQSH Davlat departamenti bayonotida.
Eslatib o‘tamiz, avgust oyida Shimoliy Koreya Janubiy Koreya yetakchisi Yun Sok Yol prezidentligining 100-kunida G‘arbiy Koreya ko‘rfazi yo‘nalishida ikkita qanotli raketa uchirgan edi.
KXDR o‘zini o‘zi yadro davlati deb e’lon qildi
Sentabr boshida Shimoliy Koreya unga yadro davlati maqomini beruvchi qonunni qabul qilib, o‘zini o‘zi yadro davlati deb e’lon qilgandi. Bu respublikaga unga hujum qilgan taqdirda dushmanga yadro zarbasi berish imkoniyatini taqdim etadi. KXDR yetakchisi Kim Chen In Koreya yarim orolini yadrodan xoli qilish bo‘yicha muzokaralardan bosh tortdi.“Agar dushman hujumi tufayli, davlat yadro kuchlarini boshqarish tizimi xavf ostida qolsa, dushman kuchlarini, shu jumladan, provokatsiya manbasi va qo‘mondonlik punktini yo‘q qilish maqsadidagi yadro zarbasi oldindan aniqlashtirib olingan reja bo‘yicha avtomatik tarzda va zudlik bilan beriladi”, — deyiladi hujjatda.
Shuningdek, Kim Chen Inga hujum bo‘lgan taqdirda ham yadro zarbasi berilishi mumkin. Shu bilan birga ta’kidlanishicha, yadro quroli ”tashqi tajovuzga qarshi so‘nggi chora sifatida foydalaniladi”, va Shimoliy Koreya uni birinchi bo‘lib qo‘llamaydi. Respublika yadro qurolini boshqa mamlakatlar hududlariga joylashtirmaslik va ularga yadro quroli bilan bog‘liq texnologiyalar, obyektlar yoki materiallarni bermaslik majburiyatini oladi.
Izoh (0)