30 сентябрь куни 15:00 да (Тошкент вақти билан 17:00) Кремлда янги ҳудудларнинг Россия таркибига қўшилиши ҳақидаги шартномалар имзоланади. Бу ҳақда президент матбуот котиби Дмитрий Песков журналистларга маълум қилди, деб ёзади «РБК».
Унинг сўзларига кўра, Георгий залидаги тадбирда президент янги ҳудудлар раҳбарлари билан учрашув ўтказади. Бундан ташқари, у узун нутқ билан чиқиш қилади.
Россия президенти Владимир Путин ЛХДР, ДХР ҳамда Херсон ва Запорожье вилоятларининг босиб олинган ҳудудлари РФ таркибига қўшилганини 30 сентябрь куни эълон қилиши мумкинлиги аввалроқ маълум бўлган эди.
Шундан кейин парламентнинг иккала палатаси ҳам Путин томонидан имзоланган тегишли қонунларни маъқуллаши мумкин. Давлат думаси спикери Вячеслав Володин маълум қилишича, Россия парламентининг қуйи палатаси 3 октябрь куни режадан ташқари мажлисига йиғилади, бундай қарор айнан нима билан боғлиқлигига у аниқлик киритмади.
Россия парламентининг юқори палатаси Федерация кенгаши эса аннексияни 4 октябрь кунги мажлисда тасдиқлаши мумкин. Спикер Валентина Матвиенко бу масалада режадан ташқари йиғилиш ўтказилмаслигини маълум қилди.
28 сентябрь куни ЛХР ва Херсон вилояти раҳбарлари Путинга мурожаат қилиб, Россия таркибига қабул қилишни сўраган эди.
Референдумлар
Россия таркибига кириш ҳақидаги референдумларда овоз бериш 27 сентябрь куни якунланди. 28 сентябрь куни эрталаб Донбасс сайлов комиссиялари овозларнинг 100 фоизи кўриб чиқилганидан кейин референдумлар натижаларини эълон қилди. Уларнинг айтишича, ЛХР сайловчиларининг 98,42 фоизи, ДХР электоратининг 99,23 фоизи, Запорожье ва Херсон вилоятлари босиб олинган ҳудудлари аҳолисининг эса тегишли равишда 93,1 фоизи ва 87,05 фоизи Россия таркибига қўшилишни ёқлаб овоз берган.Референдумлар бошланишидан олдиноқ Путин Россия Донбасс, шунингдек, икки вилоят фуқароларининг якуний қарорини қўллаб-қувватлашини айтганди.
АҚШ ва Евроиттифоқ эса референдум натижаларини тан олмаслигини маълум қилган ва у ўтказилган тақдирда, Россияга қарши янги санкциялар киритиш билан таҳдид қилганди. Шунингдек, Сербия ва Туркия ҳам овоз бериш якунларини тан олмаслигини билдирган.
Канада бош вазири референдумлар туфайли Россияга қарши янги санкциялар киритилишини эълон қилди. Зеленский эса референдумлар тан олинса, Путин билан музокаралар ўтказмаслигини айтди.
Изоҳ (0)