Oq uy: safarbarlikdan qochayotgan rossiyaliklar AQSHga boshpana so‘rab murojaat qilishi mumkin

Safarbarlikdan qochayotgan Rossiya fuqarolari AQSHda boshpana uchun ariza berishi mumkin. Bu haqda Oq uy matbuot kotibi Karin Jan-Pyer ma’lum qildi.

“Bizning fikrimizcha, millatidan qat’iy nazar, ular AQSHda boshpana taqdim etilishi uchun ariza berishi mumkin va har bitta ariza alohida ko‘rib chiqiladi”, — dedi Jan-Pyer.

AQSH hukumati “boshpana izlayotganlarning hammasini” iliq kutib oladi, deya qo‘shib qo‘ydi Oq uy matbuot kotibi. Biroq u safarbarlikdan qochayotgan rossiyaliklarga boshpana taqdim etish bo‘yicha qandaydir imtiyozli tartib yoki maxsus shartlar qo‘llanilishi haqida hech narsa demadi.

Avvalroq Germaniya hukumati muayyan holatlarda Rossiya armiyasidan qochganlarga va “Putin rejimiga qarshi bo‘lganlar”ga boshpana taqdim etishga tayyorligini ma’lum qilgandi.

Rossiyada safarbarlik 21-sentabr kuni e’lon qilindi. O‘shandan buyon mamlakatni minglab odamlar tark etdi. Chegaradosh davlatlar — Qozog‘iston, Gruziya, Mo‘g‘uliston va Finlyandiyaning o‘zi qariyb 200 ming rossiyalikni qabul qildi.

Yevroittifoqning ba’zi mamlakatlari, xususan, Latviya va Chexiya safarbarlikdan qochayotgan rossiyaliklarga vizalar bermasligini ma’lum qildi.

O‘z navbatida, Yevrokomissiya Yevroittifoq safarbarlik sharoitlarida boshpana so‘rayotgan rossiyaliklar uchun kirish huquqini kafolatlashi kerakligini aytdi.