Rossiya Gruziya bilan chegaraga bronetransportyor joylashtirdi

Rossiya Federal xavfsizlik xizmati (FXX) Shimoliy Osetiyada Gruziya bilan chegaradagi “Verxniy Lars” chegara punktiga harbiy xizmatchilar bilan birga bronetransportyor (piyoda askarlarni olib yurish va razvedka uchun belgilangan zirhli avtomashina) jo‘natdi. Bu haqda “RBK” FXXning Shimoliy Osetiya bo‘yicha chegara boshqarmasiga tayanib xabar berdi.

“Bronetransportyor u yoqqa qarab yo‘l oldi, lekin u blok-post o‘rnatish uchun borayotgani yo‘q, bu, qo‘pol qilib aytganda, har qanday kutilmagan vaziyat uchun zaxira, masalan, zaxiradagi harbiy xizmatchilar o‘tkazish punktini yorib o‘tib, chegara bo‘yicha hech qanday rasmiyatchiliklarsiz mamlakatni tark etmoqchi bo‘lishi bilan bog‘liq holatlar uchun”, — deya ma’lum qilishdi chegara boshqarmasidagilar va FXX blok-postlar o‘rnatmoqchi emasligini ta’kidladi.

“Nazorat-o‘tkazish punkti odatiy rejimda ishlayapti, chaqiruv yoshidagi erkak fuqarolarning mamlakatdan chiqishi bo‘yicha hech qanday cheklovlar kiritilgani yo‘q”, — deya qo‘shimcha qilishdi idoradagilar.

Askarlarni ortib olgan bronetransportyor yetib kelgani haqida chegarada turgan odamlar ham xabar bergan va chegara punktida olingan videolarni e’lon qilgan edi.

Avvalroq Rossiya-Gruziya chegarasidagi “Verxniy Lars” o‘tkazish punktida avtomobillardan iborat katta tirbandlik tufayli, Rossiya fuqarolariga chegarani piyoda kesib o‘tishga ruxsat berilgani haqida xabarlar paydo bo‘lgan edi.

FXXning Shimoliy Osetiya bo‘yicha chegara boshqarmasianiqlik kiritishicha, rossiyaliklarga chegarani piyoda emas, balki samokat yoki velosipedlarda kesib o‘tishga ruxsat berilgan.

“TASS” ma’lumotlariga ko‘ra, 26-sentabr kuni Rossiya va Gruziya chegarasida qariyb uch yarim mingta yengil avtomobil to‘planib qolgan. Guvohlarning aytishicha, tirbandlik 20 kilometrga cho‘zilib ketgan.

Rossiyada nimalar bo‘lyapti?

21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.

Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi. Xizmat o‘tab bo‘lgan, harbiy-hisob mutaxassisligi va jangovar tajribaga ega bo‘lganlargina chaqiriladi. Talabalar va shoshilinch xizmat harbiy xizmatchilari safarbar etilmaydi, degan edi Shoygu.

Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.

Chaqiruv yoshidagi fuqarolar mamlakatni tark etishi taqiqlanmoqda

Dastlab Rossiya hududlaridagi harbiy komissarlar safarbarlik bo‘yicha armiyaga chaqirilishi kerak bo‘lgan odamlarga o‘z shahri yoki tumanini tark etishni taqiqlagandi, biroq 23-sentabrga kelib, ularning buyruqlarida Rossiyadan chiqish ketishga nisbatan taqiqlar paydo bo‘ldi.

Meduza manbalari ma’lum qilishicha, DXR, LXR va Ukrainaning Xerson va Zaporojye viloyatlaridagi bosib olingan hududlarda “referendum” tugaganidan keyin safarbarlik yoshidagi erkaklarga Rossiyadan chiqib ketish taqiqlanishi kutilmoqda. Taqiq 28-sentabr kuni kiritilishi mumkin.

Safarbarlik haqida e’lon qilinganidan keyin Rossiya hududini 261 ming nafar erkak tark etgan.