Сафарбарликдан қочаётган Россия фуқаролари АҚШда бошпана учун ариза бериши мумкин. Бу ҳақда Оқ уй матбуот котиби Карин Жан-Пьер маълум қилди.
«Бизнинг фикримизча, миллатидан қатъий назар, улар АҚШда бошпана тақдим этилиши учун ариза бериши мумкин ва ҳар битта ариза алоҳида кўриб чиқилади», — деди Жан-Пьер.
АҚШ ҳукумати «бошпана излаётганларнинг ҳаммасини» илиқ кутиб олади, дея қўшиб қўйди Оқ уй матбуот котиби. Бироқ у сафарбарликдан қочаётган россияликларга бошпана тақдим этиш бўйича қандайдир имтиёзли тартиб ёки махсус шартлар қўлланилиши ҳақида ҳеч нарса демади.
Аввалроқ Германия ҳукумати муайян ҳолатларда Россия армиясидан қочганларга ва «Путин режимига қарши бўлганлар»га бошпана тақдим этишга тайёрлигини маълум қилганди.
Россияда сафарбарлик 21 сентябрь куни эълон қилинди. Ўшандан буён мамлакатни минглаб одамлар тарк этди. Чегарадош давлатлар — Қозоғистон, Грузия, Мўғулистон ва Финляндиянинг ўзи қарийб 200 минг россияликни қабул қилди.
Евроиттифоқнинг баъзи мамлакатлари, хусусан, Латвия ва Чехия сафарбарликдан қочаётган россияликларга визалар бермаслигини маълум қилди.
Ўз навбатида, Еврокомиссия Евроиттифоқ сафарбарлик шароитларида бошпана сўраётган россияликлар учун кириш ҳуқуқини кафолатлаши кераклигини айтди.
Изоҳ (0)