Kanada qisman tan olingan Donetsk va Lugansk xalq respublikalari, shuningdek, Ukrainaning Zaporojye va Xerson viloyatlaridagi referendumlar tufayli Rossiyaga qarshi yangi sanksiyalar kiritadi. Bu haqda mamlakat bosh vaziri Jastin Tryudo ma’lum qildi.
“Vaziyatning yanada keskinlashuviga javoban, biz davlat suvereniteti tamoyillarini buzishga qaratilgan so‘nggi urinishga aloqador shaxslar va tashkilotlarga qarshi yangi sanksiyalar kiritmoqchimiz”, — dedi u.
Tryudo ta’kidlashicha, Kanada “soxta referendumlar” natijalarini yoki Ukraina hududlarining Rossiya tarkibiga noqonuniy qo‘shib olishga urinishlarni hech qachon tan olmaydi.
Siyosatchining qo‘shimcha qilishicha, Kanada va uning xalqaro sheriklari Ukrainani o‘z hududiy yaxlitligi va suvereniteti uchun kurashda bundan keyin ham qo‘llab-quvvatlashda davom etadi. “Ukrainaning hududi Ukraina ixtiyorida qoladi”, — deya xulosa qildi Tryudo.
Ukraina hududlaridagi referendumlar yuzasidan xuddi shunday pozitsiyani Yevrokengash rahbari Sharl Mishel ham aytib o‘tgan edi. “Soxta referendum. Soxta natijalar. Biz unisiniyam, bunisiniyam tan olmaymiz”, — deb yozdi u Twitter’da.
Referendumlar
Rossiya tarkibiga kirish haqidagi referendumlarda ovoz berish 27-sentabr kuni yakunlandi. 28-sentabr kuni ertalab Donbass saylov komissiyalari ovozlarning 100 foizi ko‘rib chiqilganidan keyin referendumlar natijalarini e’lon qildi. Ularning aytishicha, LXR saylovchilarining 98,42 foizi, DXR elektoratining 99,23 foizi, Zaporojye va Xerson viloyatlari bosib olingan hududlari aholisining esa tegishli ravishda 93,1 foizi va 87,05 foizi Rossiya tarkibiga qo‘shilishni yoqlab ovoz bergan.Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
Rossiya Federatsiya kengashi raisi Valentina Matviyenko yuqori palata tomonidan yangi hududlarning Rossiya tarkibiga kirishi haqidagi qonunlar ko‘rib chiqiladigan majlis 4-oktabrda o‘tkazilishi mumkinligini aytgandi. Shu bilan birga, u rejadan tashqari yig‘ilishlar o‘tkazish zarurati yo‘qligini ta’kidladi.
Agar to‘rtta hudud aholisi Rossiya tarkibiga kirish istagini bildirsa, bu xohish qo‘llab-quvvatlanishini qayd etgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Mavzuga doir:
Izoh (0)