Канада қисман тан олинган Донецк ва Луганск халқ республикалари, шунингдек, Украинанинг Запорожье ва Херсон вилоятларидаги референдумлар туфайли Россияга қарши янги санкциялар киритади. Бу ҳақда мамлакат бош вазири Жастин Трюдо маълум қилди.
«Вазиятнинг янада кескинлашувига жавобан, биз давлат суверенитети тамойилларини бузишга қаратилган сўнгги уринишга алоқадор шахслар ва ташкилотларга қарши янги санкциялар киритмоқчимиз», — деди у.
Трюдо таъкидлашича, Канада «сохта референдумлар» натижаларини ёки Украина ҳудудларининг Россия таркибига ноқонуний қўшиб олишга уринишларни ҳеч қачон тан олмайди.
Сиёсатчининг қўшимча қилишича, Канада ва унинг халқаро шериклари Украинани ўз ҳудудий яхлитлиги ва суверенитети учун курашда бундан кейин ҳам қўллаб-қувватлашда давом этади. «Украинанинг ҳудуди Украина ихтиёрида қолади», — дея хулоса қилди Трюдо.
Украина ҳудудларидаги референдумлар юзасидан худди шундай позицияни Еврокенгаш раҳбари Шарл Мишел ҳам айтиб ўтган эди. «Сохта референдум. Сохта натижалар. Биз унисиниям, бунисиниям тан олмаймиз», — деб ёзди у Twitter’да.
Референдумлар
Россия таркибига кириш ҳақидаги референдумларда овоз бериш 27 сентябрь куни якунланди. 28 сентябрь куни эрталаб Донбасс сайлов комиссиялари овозларнинг 100 фоизи кўриб чиқилганидан кейин референдумлар натижаларини эълон қилди. Уларнинг айтишича, ЛХР сайловчиларининг 98,42 фоизи, ДХР электоратининг 99,23 фоизи, Запорожье ва Херсон вилоятлари босиб олинган ҳудудлари аҳолисининг эса тегишли равишда 93,1 фоизи ва 87,05 фоизи Россия таркибига қўшилишни ёқлаб овоз берган.Референдумлар бошланишидан олдиноқ Путин Россия Донбасс, шунингдек, икки вилоят фуқароларининг якуний қарорини қўллаб-қувватлашини айтганди.
Россия Федерация кенгаши раиси Валентина Матвиенко юқори палата томонидан янги ҳудудларнинг Россия таркибига кириши ҳақидаги қонунлар кўриб чиқиладиган мажлис 4 октябрда ўтказилиши мумкинлигини айтганди. Шу билан бирга, у режадан ташқари йиғилишлар ўтказиш зарурати йўқлигини таъкидлади.
Агар тўртта ҳудуд аҳолиси Россия таркибига кириш истагини билдирса, бу хоҳиш қўллаб-қувватланишини қайд этганди.
АҚШ ва Евроиттифоқ эса референдум натижаларини тан олмаслигини маълум қилган ва у ўтказилган тақдирда, Россияга қарши янги санкциялар киритиш билан таҳдид қилганди. Шунингдек, Сербия ва Туркия ҳам овоз бериш якунларини тан олмаслигини билдирган.
Изоҳ (0)