AQSH Ukrainaga 1,1 milliard dollarlik yangi harbiy yordam paketini taqdim etishga tayyorlanmoqda. Bu haqda Amerika rahbariyatidagi manbaga tayanib, Reuters xabar berdi.
Bu yordam Xerson va Zaporojye viloyatlarida, shuningdek, Donetsk va Lugansk xalq respublikalarida bo‘lib o‘tgan Rossiyaga qo‘shilish bo‘yicha referendumlarga javob bo‘ladi. Yangi paket yaqin kunlarda e’lon qilinadi, dedi ismini oshkor qilmaslik sharti bilan manba.
Manbaga ko‘ra, to‘plamga yangi HIMARS baravar o‘t ochuvchi reaktiv tizimlar, o‘q-dorilar, jangovar dronlardan mudofaa tizimi, shuningdek, texnik yordam vositalari kiradi.
Bundan tashqari, manbaning ta’kidlashicha, AQSH referendumlar natijalari e’lon qilinganidan keyin Rossiyaga qarshi qo‘llash uchun yangi sanksiyalar paketini tayyorlamoqda.
Avvalroq AQSH Davlat kotibi Entoni Blinken referendumlar harbiy harakatlarni to‘xtatish uchun asos bo‘lmasligini aytgan edi. Vashington Ukraina yo‘qotilgan hudud ustidan nazoratni qayta tiklashi uchun Kiyevni qurol-yarog‘ bilan ta’minlashda davom etmoqchi.
23—27-sentabr kunlari DXR, LXR, Xerson va Zaporojye viloyatlarida Rossiyaga qo‘shilish bo‘yicha referendumlar bo‘lib o‘tdi. To‘rt viloyatda ham saylovchilarning ishtiroki 50 foizdan oshgan. Saylov byulletenlari 100 foiz qayta sanalganidan so‘ng, Rossiyaga qo‘shilish LXRda 98,4 foiz, Xerson viloyatida 87 foiz, Zaporojye viloyatida 93,1 foiz, DXRda esa 99,23 foiz ishtirokchi tomonidan qo‘llab-quvvatlangani aytilmoqda.
Izoh (0)