Қисман тан олинган Абхазия республикаси ҳукумати фуқароларни Россиянинг Украинадаги махсус операцияга жўнатиш учун сафарбар қилмаяпти, аммо кўнгиллилар бор. Бу ҳақда республика ташқи ишлар вазирлиги раҳбари Инал Ардзинба маълум қилди.
«Бизда сафарбарлик йўқ. 2014 йилдан бери абхазиялик кўнгиллилар қўлига қурол олиб, Донбасс озодлигини ҳимоя қилаётганига эътибор қаратмоқчиман, уларнинг сони ортиб бормоқда. Афсуски, қурбонлар бор», — дейди Ардзинба.
Маълумот учун Россия Абхазия ва Жанубий Осетия мустақиллигини 2008 йилнинг августида тан олган. Бу Жанубий Осетияда қуролли можаро бошланиб, рус қўшинлари «тинчликни таъминлаш» учун у ерга киритилганидан кейин содир бўлган. Грузия президенти Михаил Саакашвили ушбу ҳудудларни оккупация қилинган деб атади ҳамда Мустақил Давлатлар Ҳамдўстлиги таркибидан чиқишини маълум қилди.
2005 йилдаёқ Абхазия аҳолисининг қарийб 95 фоизи Россия фуқаролигига эга эди. 2022 йилнинг 27 сентябрь куни Россия ташқи ишлар вазири Сергей Лавров Москвада абхазиялик ҳамкасби билан учрашувда икки фуқаролик бўйича келишув имзолаганини маълум қилди. Унда Абхазия фуқаролари соддалаштирилган режимда Россия фуқаролигини олиши мумкинлиги айтилади.
Россия президенти Владимир Путин 21 сентябрь куни қисман сафарбарлик эълон қилган эди. Meduza Россия президенти маъмуриятига яқин манбага таяниб, Кремль Абхазия ва Жанубий Осетия аҳолисини урушга сафарбар қилиш имкониятини кўриб чиқаётгани ҳақида хабар берди.
Изоҳ (0)