22-sentabr kuni Toshkent shahrida Litva faxriy konsulxonasining ochilish marosimi bo‘lib o‘tdi, deb xabar bermoqda “Dunyo” axborot agentligi.
Qayd etilishicha, tadbirda Litva tashqi ishlar vaziri o‘rinbosari Mantos Adomenas boshchiligidagi delegatsiya a’zolari va boshqa mehmonlar ishtirok etdi.
Adomenas Litva delegatsiyasining Toshkentga tashrifi yuqori darajada tashkil etilgani uchun O‘zbekiston tomoniga minnatdorlik bildirdi hamda vazirliklararo siyosiy maslahatlashuvlarning navbatdagi raundi yakunlari bo‘yicha erishilgan kelishuvlar hayotga samarali tatbiq etilishiga umid bildirdi.
O‘z navbatida, O‘zbekiston vakillari Litva mamlakatning Yevropadagi muhim hamkori ekani, vazir o‘rinbosari Mantos Adomenasning ushbu tashrifi ikki tomonlama aloqalar darajasi o‘sib borayotganining tasdig‘i sifatida baholanishini qayd etgan.
Faxriy konsulxona faoliyati tomonlarni qiziqtirgan barcha sohalarda O‘zbekiston—Litva aloqalarini mustahkamlashga xizmat qilishiga ishonch bildirilgan.
22-sentabr kuni Tashqi ishlar vazirligida O‘zbekiston—Litva vazirliklararo siyosiy maslahatlashuvlarining navbatdagi raundi bo‘lib o‘tgan. Unda O‘zbekiston va Litva tashqi ishlar vazirlari o‘rinbosarlari G‘ayrat Fozilov va Mantos Adomenas boshchiligidagi delegatsiyalar tomonlarni qiziqtirgan turli sohalardagi ikki tomonlama munosabatlarning bugungi holati va istiqbollarini muhokama qilgan.
Izoh (0)