“Tarbiyachi va o‘qituvchilarni tibbiy ko‘rikdan o‘tkazishda pul talab qilish holatlari haqida murojaatlar bo‘lyapti” – Rasul Kusherbayev

Oliy Majlis Qonunchilik palatasi deputati Rasul Kusherbayevning ma’lum qilishicha, o‘qituvchi va maktabgacha ta’lim muassasalari tarbiyachilari bepul tibbiy ko‘rikdan bepul o‘tishlari mumkin bo‘lsa-da, joylarda ko‘rikni pullik tashkil qilish holati haqida murojaatlar bo‘lyapti.

Rasul Kusherbayevning alohida ta’kidlashicha, Mehnat kodeksining 214-moddasi hamda “Mehnatni muhofaza qilish to‘g‘risida”gi qonunning 24-moddasiga asosan tibbiy ko‘riklardan o‘tilishi munosabati bilan xodimlar chiqimdor bo‘lmaydilar.

“Ya’ni majburiy tibbiy ko‘riklar xodimlar, shu jumladan, o‘qituvchi va tarbiyachi xodimlarning o‘z hisoblaridan amalga oshirilishi mumkin emas. Agar ish beruvchi xodim o‘z hisobidan tibbiy ko‘rikdan o‘tishini talab qilsa, ushbu xodim mehnat organi, prokuratura yoki kasaba uyushmalariga murojaat qilishi kerak”, – dedi deputat.

Uning aytishicha, Sog‘liqni saqlash vazirligidan har bir hudud bo‘yicha viloyat boshqarmalari, tuman sog‘liqni saqlash bo‘limlariga topshiriqlar berilgan.

“Shunga qaramay joylarda tibbiy ko‘rikni pullik tashkil qilish bo‘yicha talab qilish holatlari uchrab turganligi haqida murojaatlar bo‘lyapti. Hurmatli tarbiyachilar va o‘qituvchilar, bilib qo‘yingizlar! Agar shunday holat bo‘ladigan bo‘lsa, siz zudlik bilan tegishli viloyat sog‘liqni saqlash boshqarmasiga bu haqda xabar bering va ularning ishonch aloqa telefonlariga bog‘laning. Ular bu bo‘yicha qonuniy chorani ko‘rishni o‘z bo‘yniga olishgan. Yana bir bor eslatib o‘tmoqchimiz. Hurmatli tarbiyachilar, pedagoglar va o‘qituvchilar, sizlar bepul tibbiy ko‘rikdan o‘tish huquqiga egasi va bu bo‘yicha Sog‘liqni saqlash vazirligi tomonidan tegishli choralar amalga oshirilmoqda. Marhamat, bu huquqdan foydalaning”, – Rasul Kusherbayev.

Mehnat kodeksining 214-moddasiga ko‘ra, umumta’lim maktablari, maktabgacha ta’lim tashkilotlari va boshqa muassasalarning bevosita bolalarga ta’lim yoki tarbiya berish bilan mashg‘ul bo‘lgan pedagog va boshqa xodimlari tibbiy ko‘rikdan o‘tkazishni tashkil qilishi shart.

Mehnat sharoiti noqulay ishlar va bajarilayotganida dastlabki tarzda va vaqti-vaqti bilan tibbiy ko‘rikdan o‘tilishi lozim bo‘lgan boshqa ishlarning ro‘yxati va ularni o‘tkazish tartibi O‘zbekiston respublikasi Sog‘liqni saqlash vazirligi tomonidan belgilanadi.

Tibbiy ko‘riklardan o‘tilishi munosabati bilan xodimlar chiqimdor bo‘lmaydilar.