22 сентябрь куни Тошкент шаҳрида Литва фахрий консулхонасининг очилиш маросими бўлиб ўтди, деб хабар бермоқда «Дунё» ахборот агентлиги.
Қайд этилишича, тадбирда Литва ташқи ишлар вазири ўринбосари Мантос Адоменас бошчилигидаги делегация аъзолари ва бошқа меҳмонлар иштирок этди.
Адоменас Литва делегациясининг Тошкентга ташрифи юқори даражада ташкил этилгани учун Ўзбекистон томонига миннатдорлик билдирди ҳамда вазирликлараро сиёсий маслаҳатлашувларнинг навбатдаги раунди якунлари бўйича эришилган келишувлар ҳаётга самарали татбиқ этилишига умид билдирди.
Ўз навбатида, Ўзбекистон вакиллари Литва мамлакатнинг Европадаги муҳим ҳамкори экани, вазир ўринбосари Мантос Адоменаснинг ушбу ташрифи икки томонлама алоқалар даражаси ўсиб бораётганининг тасдиғи сифатида баҳоланишини қайд этган.
Фахрий консулхона фаолияти томонларни қизиқтирган барча соҳаларда Ўзбекистон—Литва алоқаларини мустаҳкамлашга хизмат қилишига ишонч билдирилган.
22 сентябрь куни Ташқи ишлар вазирлигида Ўзбекистон—Литва вазирликлараро сиёсий маслаҳатлашувларининг навбатдаги раунди бўлиб ўтган. Унда Ўзбекистон ва Литва ташқи ишлар вазирлари ўринбосарлари Ғайрат Фозилов ва Мантос Адоменас бошчилигидаги делегациялар томонларни қизиқтирган турли соҳалардаги икки томонлама муносабатларнинг бугунги ҳолати ва истиқболларини муҳокама қилган.
Изоҳ (0)