Toshkentning Yashnobod tumanidagi ko‘p qavatli uyda joylashdan do‘kon va unga tutash ofisda 18-avgust kuni yong‘in chiqqandi. O‘tkazilgan tekshiruv jarayonida yong‘in N.J. tomonidan sodir etilgani aniqlangandi. Poytaxt IIBB ushbu shaxs Qashqadaryoda qo‘lga olinganini ma’lum qildi.
Dastlab yong‘in nimadan chiqqani noma’lum edi. Yong‘in o‘chog‘idan olingan ekspertiza natijalari, olov elektr yoki gazdan kelib chiqmaganini ko‘rsatgan. Baxtli tasodif tufayli qo‘shni do‘konga o‘rnatilgan kuzatuv kamerasiga zarar yetmagani sabab undagi tasvirlar saqlanib qolgan. Unda tun yarmida velosipedda qora kepka va niqobda kelgan shaxs do‘kon eshigini sindirib, yonuvchi moddani sepib, do‘konga o‘t qo‘ygani aks etgan.
Olib borilgan surishtiruv harakatlari natijasiga ko‘ra, ushbu jinoyatni 1981-yilda Qashqadaryo viloyatida tug‘ilgan, muqaddam bir necha marotaba jinoyat sodir etib sudlangan Nuriddin ismli shaxs sodir etgani aniqlangan va u Qashqadaryo viloyatida qo‘lga olingan.
Olingan ma’lumotlarga ko‘ra, qasddan sodir etilgan yong‘in tufayli do‘kon egalariga 4 milliard so‘mga yaqin zarar yetkazilgan.
Mazkur holat yuzasidan Yashnobod tumani IIO FMB Tergov bo‘limi tomonidan Jinoyat kodeksining 173-moddasi (mulkni qasddan nobud qilish yoki unga zarar yetkazish) bilan jinoyat ishi qo‘zg‘atilgan.
Izoh (0)