O‘zbekiston va Kuvayt poytaxtlari o‘rtasida to‘g‘ridan to‘g‘ri havo qatnovlari yo‘lga qo‘yilganiga bir yil o‘tganidan so‘ng, Jazeera Airways kompaniyasi O‘zbekistonning kattaligi bo‘yicha uchinchi shahri bo‘lgan Namangan yo‘nalishida reyslar ochilganini e’lon qildi, deb xabar qilmoqda “Dunyo” AA.
Aviakompaniya yangi yo‘nalish bo‘yicha parvozlarni haftasiga uchta reys bilan — dushanba, chorshanba, juma kunlari amalga oshirishni rejalashtirmoqda. Birinchi aviaparvoz 2022-yilning 30-sentabr kuni yo‘lga qo‘yiladi.
Ta’kidlanishicha, Kuvayt bilan Toshkent va Namangan yo‘nalishlarida to‘g‘ridan to‘g‘ri parvozlarning amalga oshirilishi ikki mamlakat o‘rtasida savdo-iqtisodiy, investitsiyaviy va gumanitar hamkorlikni yanada rivojlantirish uchun muhimdir hamda respublikamizga kelayotgan xorijiy sayyohlarning sonini sezilarli oshishiga xizmat qiladi. Shu bilan birga, O‘zbekistonda ishlab chiqarilayotgan mahsulotlarning Kuvaytga eksporti hajmini oshirish uchun qulay imkoniyatlar yaratadi.
Hozirgi paytda Jazeera Airways bilan Al-Kuvayt—Samarqand—Al-Kuvayt yo‘nalishi bo‘yicha aviaparvozlarni yo‘lga qo‘yish masalasi ishlab chiqilmoqda.
Jazeera Airways Namangan—Kuvayt—Namangan yo‘nalishida doimiy reyslarni yo‘lga qo‘yishni rejalashtirayotgani haqida iyun oyida ma’lum bo‘lgandi. “Mazkur yo‘nalish Namangan, umuman, vodiy aholisiga Fors ko‘rfazi davlatlariga sayohat qilish uchun imkoniyat yaratadi. Qolaversa, umra safarini amalga oshirish istagidagi ziyoratchilar uchun ham o‘ziga xos qulayliklar tug‘diradi”, — degan edi aviakompaniyasi vakili Ildar Abubakirov.
Ma’lumot uchun, Jazeera Airways Kuvayt milliy aviakompaniyasi bo‘lib, 2004-yildan beri Pokiston, Hindiston, Shri-Lanka, Nepal, Yaqin Sharq va Yevropa davlatlariga parvozlarni amalga oshirib kelmoqda. Ushbu aviakompaniya 2021-yili Kuvayt—Toshkent yo‘nalishi bo‘yicha reysni ham yo‘lga qo‘ygandi.
Izoh (0)