Ижтимоий тармоқларда Наманган шаҳридаги 2-сонли касб-ҳунар мактаби посбонлари ўқувчиларни калта пайпоқ кийгани учун ичкарига киритмагани ҳақидаги хабарлар тарқалди. «Дарё» ушбу ҳолатга аниқлик киритиш учун Наманган вилоят касбий таълимни ривожлантириш ва мувофиқлаштириш ҳудудий бошқармаси мутасаддилар билан боғланди.
Хабарларга «Ташқарида 21 аср. Илон Маск бутун дунёни бепул интернет билан таъминлаш учун ҳаракатлар олиб бораётганда, дунёнинг бир четида барака топгур маънавиятчилар калта пайпоқ каби миллий душман билан овора», дея изоҳ қолдирилган ва ушбу посбонлар Миллий гвардия ходимлари бўлиши мумкинлиги тахмин қилинган.
Бошқарма ахборот хизматининг маълум қилишича, мазкур воқеа юзасидан ишчи гуруҳ тузилиб, ҳолат жойида ўрганилган. Маълум бўлишича, ўқувчилар хавфсизлигини таъминлаш, касб-ҳунар мактаби ҳудудига бегона шахслар киришига йўл қўймаслик мақсадида хусусий қўриқлаш хизмати билан шартнома тузилган. Шу боис муассасани Миллий гвардия ходимлари қўриқлагани ҳақидаги тахминлар ҳақиқатга тўғри келмайди.
«Суратлардаги ўқувчиларга ҳеч қандай тазйиқ ўтказилмагани, ўқувчилар ўзлари тўхтаб туришгани, қўриқлаш хизмати ходими эшик тагида ўқувчиларни киришини назорат қилаётгани аниқланди. Шуни алоҳида таъкидлаш жоизки, касб-ҳунар мактаби раҳбарияти томонидан қўриқлаш хизмати ходимларига тегишли тартибда, қонун доирасида фаолият юритишлари тушунтирилган», — дейилади бошқарма ахборот хизмати хабарида.
Изоҳ (0)