Qoraqalpog‘istonliklar endilikda hudud rahbariyatiga Telegram-bot orqali murojaat qilishi mumkin bo‘ldi. Bu haqda Qoraqalpog‘iston Respublikasi Jo‘qorg‘i Kenges raisi Amanbay O‘rinbayev ma’lum qildi, deya xabar berdi “Daryo” muxbiri.
Qayd etilishicha, 25-sentabr kunidan boshlab Jo‘qorg‘i Kenges raisi tomonidan fuqarolarning murojaatlarini qabul qilish, ularning muammolarini shaxsan nazoratiga olinishini ta’minlash maqsadida Telegram-bot ishga tushirilgan.
“Bilaman, bu botning to‘liq ravishda ishlab ketishi ham qiyin. Sababi hozir avtomatlashtirilgan dasturini to‘liq ishlab chiqishga ulgurmadik. Hozircha hammasi qo‘lda boshqariladi. Murojaat ham ko‘payadi. Bir oy ko‘payar, ikki oy ko‘payar. Ishlarni to‘g‘ri yo‘lga qo‘ysak, hammasi yaxshi bo‘ladi”, — deydi Amanbay O‘rinbayev.
Shuningdek, Jo‘qorg‘i Kenges tarkibida Murojaatlar bilan ishlash va Ijro tartibini nazorat qilish bo‘limlari ham tashkil qilingan. Qoraqalpog‘istonni ijtimoiy-iqtisodiy rivojlantirish bo‘yicha eng yaxshi taklif egasi yil yakunida taqdirlanishi e’lon qilingan.
Izoh (0)