Ukrainaga Britaniyaning yangi qurollari, jumladan, MLRS raketalari yetkazib berilmoqda. Bu haqda Buyuk Britaniya bosh vaziri Liz Trass BMT Bosh assambleyasi yig‘ilishida so‘zlagan nutqida aytib o‘tdi. U hozirgi hal qiluvchi lahzalarda “kerak bo‘lsa Ukrainaga harbiy yordamni oshiramiz”, deb va’da berdi.
“Men bu yerda nutq so‘zlayotgan vaqtim Ukrainaga Britaniyaning yangi qurollari, jumladan, MLRS raketalari yetkazib berilmoqda. Biz Ukraina g‘alaba qozonmaguncha tinchimaymiz”, — deb ta’kidladi Trass.
Uning so‘zlariga ko‘ra, bugun Rossiya Ukrainada “odamlarni o‘ldirish, mayib qilish” uchun qurol ishlatmoqda.
Trass Rossiya prezidenti Vladimir Putinning harakatlarini keskin tanqid qildi.
“Putin o‘z muvaffaqiyatsizliklarini qanday oqlamoqchi bo‘lganini ko‘rdik, u asosan zaxiradagilarni ajal domiga jo‘natib, sa’y-harakatlarini ikki baravar oshirdi”, — dedi Trass Rossiyada qisman mobilizatsiya e’lon qilinganiga ishora qilib.
Uning so‘zlariga ko‘ra, Putin “soxta bayonotlar berib, qurol bilan po‘pisa qilmoqda, ammo bu ish bermayapti”.
“Xalqaro Ittifoq ham, Ukraina ham kuchli. Ukrainaliklar nafaqat o‘z mamlakatini, balki bizning qadriyatlarimiz va butun dunyo xavfsizligini himoya qilmoqda”, — deb ta’kidladi Trass hamda shuning uchun jahon hamjamiyati faol harakat qilishi zarurligini qo‘shimcha qildi.
Izoh (0)