Rossiya Ukrainada janglar chog‘ida asirga olingan o‘n nafar xorij fuqarosini Saudiya Arabistoni valiahd shahzodasi Muhammad ibn Salmon vositachiligida ozod etdi.
Saudiya Arabistoni Tashqi ishlar vazirligi aniqlik kiritishicha, gap AQSH, Buyuk Britaniya, Shvetsiya, Xorvatiya va Marokash fuqarolari haqida bormoqda. Ular o‘tirgan samolyot Saudiya Arabistoniga kelib qo‘ngan. Buni Saudiya davlat axborot agentligi e’lon qilgan videoda ko‘rish mumkin.
Ular orasida Ukraina tomonida jang qilib, DXRda asirlikka tushgan va o‘lim jazosiga hukm qilingan Britaniya fuqarolari Shon Pinner va Eyden Aslin, shuningdek, Marokash fuqarosi Saadun Bragim ham bor. Ular bahorda asirlikka olingan, iyulda esa sud ularni yollanishda ayblab, o‘limga hukm qilgandi.
Al Arabiya ma’lumotlariga ko‘ra, Saudiya shahzodasi asirlarni ozod qilish bo‘yicha Moskva va Kiyev o‘rtasidagi muzokaralarda bevosita qatnashgan.
Buyuk Britaniya bosh vaziri Liz Trass besh nafar britaniyalik Rossiya tomonidan ozod etilganini tasdiqladi. U Saudiya Arabistoniga va Ukraina prezidenti Vladimir Zelenskiyga yordam uchun minnatdorlik bildirdi.
Avvalroq asirlar bilan ayirboshlashuv doirasida Kiyev Moskvaga siyosatchi Viktor Medvedchukni va 55 nafar rossiyalik harbiylarni topshirgandi.
Mavzuga doir:
- BMT Kiyev va Moskvani “hammasiga hamma” formatida asirlarni almashishga chaqirdi
- Zelenskiy: “Mariupolda harbiy asirlar ustidan sud o‘tkazilsa, Ukraina Rossiya bilan muzokaralardan bosh tortadi”
- Rossiya va Ukraina urush boshidan buyon harbiy asirlar va halok bo‘lgan askarlar jasadlari bilan ayirboshlash bo‘yicha 27 ta operatsiya o‘tkazgan
- Blinken Ukraina armiyasi safida jang qilgan xorijliklarning DXRda o‘limga hukm qilinishini qoraladi
Izoh (0)