Yevropa Ittifoqi Rossiyaga qarshi tez orada yangi sanksiyalar joriy etishi ma’lum qilindi

Yevropa Ittifoqi davlatlari Donbass, Zaporojye va Xerson viloyatlarida rejalashtirilgan referendumlar tufayli imkon qadar qisqa vaqt ichida Rossiyaga qarshi yangi sanksiyalar joriy qiladi. Bu haqda Yevropa diplomatiyasi rahbari Jozep Borrel ma’lum qildi.

“Rossiyaga qarshi qo‘shimcha cheklov choralari hamkorlarimiz bilan kelishilgan holda zudlik bilan, imkon qadar qisqa vaqt ichida kiritiladi”, —dedi Borrel. “Biz Ukraina sa’y-harakatlarini kerak bo‘lganda harbiy texnika yetkazib berish orqali qo‘llab-quvvatlashda davom etamiz”.

Uning ta’kidlashicha, yangi sanksiyalar ham alohida shaxslarga, ham sohaga taalluqli bo‘ladi. Diplomat gap qanday sanksiyalar haqida ketayotganiga aniqlik kiritmadi va bugun faqat siyosiy qaror qabul qilinganini qayd etdi.

Ukrainaning Donbass hududidagi respublikalar, shuningdek, rossiyalik harbiylar nazorati ostidagi Xerson va Zaporojye viloyatlari hokimiyati 19-sentabr kuni Rossiyaga qo‘shilish bo‘yicha referendum o‘tkazish niyatida ekanini ma’lum qilgandi.

21-sentabr kuni Vladimir Putin Rossiya “Donetsk va Lugansk xalq respublikalari, Zaporojye va Xerson viloyatlari aholisining ko‘pchiligi o‘z kelajagi uchun qabul qiladigan qarorni” qo‘llab-quvvatlashini ma’lum qildi.