Ayni vaqtda prezident Shavkat Mirziyoyev Nurafshon shahrida Xalq deputatlari Toshkent viloyati kengashining sessiyasida ishtirok etmoqda. Bu haqda “Daryo” muxbiri xabar berdi.
Davlat rahbari Toshkent viloyatining turizm salohiyati haqida gapirdi.
Turizm sohasining holati tahlil qilinar ekan, turistlarning 80 foizi Bo‘stonliq tumaniga borishi, boshqa tumanlarda infratuzilma va xizmatlar past darajada ekanligi, ichki va xorijiy turistlar soni 1,5 million nafarga ham yetmasligi ta’kidlandi.
“Toshkent viloyatida tushdan keyin yurib bo‘lmaydi. Hamma Bo‘stonliqqa ketadi yoki qaytadi. Albatta, bu ham yaxshilikka. Nega Parkentni ham shunday qilmaymiz? Qilsak bo‘ladi-ku. Bo‘stonliqqa yaratilgan sharoitlarni Parkentga qilsak bo‘ladi, albatta. U yerda ham imkoniyat katta. Parkentda 9 yoki 5 qavatlik mehmonxona quraylik. Odamlar kelib dam olib ketadi. Turizm vazirligiga topshiriq — haftada bir marta Parkent tumaniga borib, zarur topshiriqlarni bajarish zarur. Parkent, Angren va Ohangaron tog‘li hududlarida zamonaviy turizm klasterlarini tashkil etish ishlarini boshlash vaqti keldi”, — dedi Shavkat Mirziyoyev.Viloyatning har bir tuman va shahar hokimiga bir oy muddatda o‘z hududida turizmni qanday rivojlantirishi bo‘yicha aniq ish rejasini ishlab chiqib, ishlarni boshlash shartligi ko‘rsatib o‘tildi.
Xorijiy ekspertni jalb qilib, viloyat turizmini rivojlantirish “master-reja”sini ishlab chiqish topshirildi.
Izoh (0)