Ayni vaqtda prezident Shavkat Mirziyoyev Nurafshon shahrida Xalq deputatlari Toshkent viloyati kengashining sessiyasida ishtirok etmoqda. Bu haqda “Daryo” muxbiri xabar berdi.
Prezident o‘z so‘zida paxta yetishtirish va hosilni yig‘ib olishdagi muammolar hal etilayotganini aytib o‘tdi.
“Paxta mavsumida terimchilarga berish uchun pul berilmasdi, bir vaqtlar. Men Jizzaxda hokim bo‘lgan vaqtim Baxmal va Zomin tumanlariga borib, asal olib kelib, paxta pulining o‘rniga terimchilarga tarqatganman. Bu qiyinchiliklar mening esimdan chiqishi mumkinmi? Aslo yo‘q!”, — deydi davlat rahbari.
Shavkat Mirziyoyev hozirgi kunda paxtaning kilosiga 1,5—2 ming so‘mdan berib terdirilayotganini ta’kidladi.
“Menga bankdagi pul kerak emas, aksincha, xalqning cho‘ntagiga kirsin. Paxtani kim yetishtiradi? Kim hosilni yig‘ib oladi? Manfaat berilsa, shu odamlarimiz hammasini chiroyli qilib bajarishadi”, — deydi prezident.
Shavkat Mirziyoyev avvallari bu vaqtlarda to‘liq paxta bilan mashg‘ul bo‘linganini aytdi.
“Hozir esa barcha hokimlar vaqtining 10-15 foizini paxtaga sarflayapti. Albatta, buni bilgan biladi. Hokimlar, ularning o‘rinbosarlari, prokurorlar, ichki ishlar xodimlarigacha xizmat joyida uylar qilib beryapmiz. Maqsad — ular birovning qo‘liga qaramasdan, xalqimizni rozi qilib ishlashsin”, – deydi davlat rahbari.
Izoh (0)