Айни вақтда президент Шавкат Мирзиёев Нурафшон шаҳрида Халқ депутатлари Тошкент вилояти кенгашининг сессиясида иштирок этмоқда. Бу ҳақда «Дарё» мухбири хабар берди.
Давлат раҳбари Тошкент вилоятининг туризм салоҳияти ҳақида гапирди.
Туризм соҳасининг ҳолати таҳлил қилинар экан, туристларнинг 80 фоизи Бўстонлиқ туманига бориши, бошқа туманларда инфратузилма ва хизматлар паст даражада эканлиги, ички ва хорижий туристлар сони 1,5 миллион нафарга ҳам етмаслиги таъкидланди.
«Тошкент вилоятида тушдан кейин юриб бўлмайди. Ҳамма Бўстонлиққа кетади ёки қайтади. Албатта, бу ҳам яхшиликка. Нега Паркентни ҳам шундай қилмаймиз? Қилсак бўлади-ку. Бўстонлиққа яратилган шароитларни Паркентга қилсак бўлади, албатта. У ерда ҳам имконият катта. Паркентда 9 ёки 5 қаватлик меҳмонхона қурайлик. Одамлар келиб дам олиб кетади. Туризм вазирлигига топшириқ — ҳафтада бир марта Паркент туманига бориб, зарур топшириқларни бажариш зарур. Паркент, Ангрен ва Оҳангарон тоғли ҳудудларида замонавий туризм кластерларини ташкил этиш ишларини бошлаш вақти келди», — деди Шавкат Мирзиёев.Вилоятнинг ҳар бир туман ва шаҳар ҳокимига бир ой муддатда ўз ҳудудида туризмни қандай ривожлантириши бўйича аниқ иш режасини ишлаб чиқиб, ишларни бошлаш шартлиги кўрсатиб ўтилди.
Хорижий экспертни жалб қилиб, вилоят туризмини ривожлантириш «мастер-режа»сини ишлаб чиқиш топширилди.
Изоҳ (0)