Toshkent viloyatining Piskent, Samarqand viloyati Urgut va Jizzax viloyati Sharof Rashidov tumanlarida elektr energiyasidan qarzdorliklarni yo‘q qilib berishni va’da qilgan shaxslar ushlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Toshkent viloyat boshqarmasi tomonidan tadbirkorlik subyektlarining huquqlarini himoya qilish yuzasidan IIB xodimlari bilan hamkorlikda tezkor tadbir o‘tkazilgan. Unda Piskent tuman elektr ta’minoti korxonasi boshlig‘i U.X. tadbirkor B.ga tegishli kichik ishlab chiqarish korxonasining 106 million so‘m elektr energiyasidan qarzdorligini yo‘q qilib berish evaziga korxona qorovuli O. orqali 6 million so‘mni olgan vaqtida ashyoviy dalillar bilan ushlangan.
Urgut tuman bo‘limi tomonidan o‘tkazilgan tergovga qadar tekshiruvda tuman elektr ta’minoti korxonasida bo‘lim rahbari vazifasida ishlovchi S.T. qo‘lga olingan. U va boshqalar “K.B.” fermer xo‘jaligi rahbari A.N. va A.Y. MCHJ rahbari U.X.ning elektr energiyasidan qarzdorligini so‘ndirish uchun 35 million so‘m va 300 dollarni qo‘lga kiritib, o‘zlarining shaxsiy ehtiyojlari uchun ishlatib yuborgani aniqlangan.
Shuningdek, departament hamda DXXning Jizzax viloyati boshqarmalari tomonidan tezkor tadbir o‘tkazilgan. Unda Sh.Rashidov tuman elektr ta’minoti korxonasi huquqshunosi N.D. fuqaro R.ning xonadonida elektr energiyasidan noqonuniy foydalangani holati bo‘yicha hisoblangan 6,2 million so‘m qarzdorlikni yo‘q qilib berish evaziga 1,9 million so‘mni firibgarlik yo‘li bilan olgan vaqtida ashyoviy dalillar bilan qo‘lga olingan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)