Тошкент вилоятининг Пискент, Самарқанд вилояти Ургут ва Жиззах вилояти Шароф Рашидов туманларида электр энергиясидан қарздорликларни йўқ қилиб беришни ваъда қилган шахслар ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Тошкент вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан ИИБ ходимлари билан ҳамкорликда тезкор тадбир ўтказилган. Унда Пискент туман электр таъминоти корхонаси бошлиғи У.Х. тадбиркор Б.га тегишли кичик ишлаб чиқариш корхонасининг 106 миллион сўм электр энергиясидан қарздорлигини йўқ қилиб бериш эвазига корхона қоровули О. орқали 6 миллион сўмни олган вақтида ашёвий далиллар билан ушланган.
Ургут туман бўлими томонидан ўтказилган терговга қадар текширувда туман электр таъминоти корхонасида бўлим раҳбари вазифасида ишловчи С.Т. қўлга олинган. У ва бошқалар «К.Б.» фермер хўжалиги раҳбари А.Н. ва А.Й. МЧЖ раҳбари У.Х.нинг электр энергиясидан қарздорлигини сўндириш учун 35 миллион сўм ва 300 долларни қўлга киритиб, ўзларининг шахсий эҳтиёжлари учун ишлатиб юборгани аниқланган.
Шунингдек, департамент ҳамда ДХХнинг Жиззах вилояти бошқармалари томонидан тезкор тадбир ўтказилган. Унда Ш.Рашидов туман электр таъминоти корхонаси ҳуқуқшуноси Н.Д. фуқаро Р.нинг хонадонида электр энергиясидан ноқонуний фойдалангани ҳолати бўйича ҳисобланган 6,2 миллион сўм қарздорликни йўқ қилиб бериш эвазига 1,9 миллион сўмни фирибгарлик йўли билан олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)