20-sentabr kuni Qozog‘istonning Atirau viloyati osmoni qora tutun bilan qoplandi, deb xabar bermoqda “Zakon.kz”.
Favqulodda vaziyatlar departamenti xabariga ko‘ra, shu kuni ertalab Kaspiy dengizi qirg‘oqlarida qamish yonishni boshlagan, kechga kelib, yong‘in maydoni 60 gektardan ham oshib ketgan. Keyinroq yong‘in “Ak Jayik” davlat tabiat qo‘riqxonasi hududiga ham o‘tgan.
21-sentabr kuni Atirau viloyatida osmondan kul yog‘ayotgani qayd etilgan, shuningdek, kuyindi hidi sezilmoqda.
Ekologiya departamenti ushbu yong‘inning Atirauda atmosfera havosiga ta’sirini o‘rganishni boshladi.
Yong‘in o‘chog‘iga yaqinlashishga urinish chog‘ida botqoqlikka botib qolgan “TREKOL” rusumidagi yo‘ltanlamas butunlay yo‘q bo‘lib ketgan. Qurbonlar va jabrlanganlar yo‘q.
21-sentabr kuni ertalab yong‘inni o‘chirishga Mi-8 vertolyoti jalb qilindi. Ayni paytda havodan turib o‘t o‘chirish ishlari davom etmoqda.
Aholi punktlari xavf ostida emasligi aytilmoqda.
Departament aniqlik kiritishicha, sentabr o‘rtalaridan buyon dengiz bo‘yidagi qamishlar tez-tez yonib ketishni boshlagan.
Izoh (0)