Mo‘ynoqdagi qamishzorlarda yong‘in yuzaga keldi. Ekoqo‘mita yong‘inni o‘chirish imkoni yo‘qligini ma’lum qildi

Ijtimoiy tarmoqlarda Mo‘ynoq shaharchasi atrofidagi to‘qayzorda katta yong‘in chiqqani tasvirlangan videolar tarqaldi. Qoraqalpog‘iston Respublikasi Ekologiya qo‘mitasi holatga munosabat bildirdi.

Ekologiya qo‘mitasining Mo‘ynoq tuman bo‘limi tomonidan voqea joyiga borib o‘rganilganda yong‘in “Ushsay” OFY hududida joylashgan “Mo‘ynoq qo‘ltig‘i”dagi qamishzorlarda yuzaga kelgani aniqlangan.

“Yong‘inni o‘chirish imkoni yo‘q. Sababi qamishzorlar bo‘yi suv va botqoqlikdan iborat. Suvning keskin qaytib ketishi sababli hozirda qamishzor bo‘yidagi qamish tublari ahyon-ahyonda tutashi davom etmoqda, shamol kuchayganda esa tutun ko‘lami ortadi”, — deyiladi munosabatda.

Avvalroq Samarqand viloyatidagi qabristonlarning birida yong‘in chiqqani to‘g‘risida xabar berilgandi. Mavzuga doir: 

• Zarafshon milliy bog‘ida yong‘in sodir bo‘ldi (foto)
• Bo‘stonliq va Zominda o‘rmon yong‘inlarini bartaraf etuvchi otryadlar tashkil etiladi

Eslatib o‘tamiz, Jizzax viloyatining Zomin tumani “Duoba” qishloq fuqarolar yig‘ini O‘riklisoy qishlog‘i yaqinidagi o‘rmon hududlarida 2021-yil 1-avgust kuni yirik yong‘in yuz bergandi. Soat taxminan 10:40 da boshlangan yong‘in salkam sakkiz soatdan so‘ng o‘chirilgan. FVV ma’lumotlariga ko‘ra, 80 gektar maydonda quruq o‘t va daraxtlar yongan. Olovni o‘chirishga 1600 ga yaqin odam jalb etilgan. Keyinroq prezident Shavkat Mirziyoyev yong‘in “bir boyvachchaning o‘g‘li” sabab sodir etilganini ma’lum qilgandi.