20 сентябрь куни Қозоғистоннинг Атирау вилояти осмони қора тутун билан қопланди, деб хабар бермоқда “Zakon.kz”.
Фавқулодда вазиятлар департаменти хабарига кўра, шу куни эрталаб Каспий денгизи қирғоқларида қамиш ёнишни бошлаган, кечга келиб, ёнғин майдони 60 гектардан ҳам ошиб кетган. Кейинроқ ёнғин «Ак Жайик» давлат табиат қўриқхонаси ҳудудига ҳам ўтган.
21 сентябрь куни Атирау вилоятида осмондан кул ёғаётгани қайд этилган, шунингдек, куйинди ҳиди сезилмоқда.
Экология департаменти ушбу ёнғиннинг Атирауда атмосфера ҳавосига таъсирини ўрганишни бошлади.
Ёнғин ўчоғига яқинлашишга уриниш чоғида ботқоқликка ботиб қолган «ТРЕКОЛ» русумидаги йўлтанламас бутунлай йўқ бўлиб кетган. Қурбонлар ва жабрланганлар йўқ.
21 сентябрь куни эрталаб ёнғинни ўчиришга Ми-8 вертолёти жалб қилинди. Айни пайтда ҳаводан туриб ўт ўчириш ишлари давом этмоқда.
Аҳоли пунктлари хавф остида эмаслиги айтилмоқда.
Департамент аниқлик киритишича, сентябрь ўрталаридан буён денгиз бўйидаги қамишлар тез-тез ёниб кетишни бошлаган.
Изоҳ (0)