Buyuk Britaniyaning The Economist jurnalida Orolbo‘yi mintaqasini tiklashga qaratilgan ekologik loyiha mavzusiga bag‘ishlangan maqola chop etildi, deb xabar bermoqda “Dunyo” axborot agentligi.
Qayd etilishicha, unda tibbiyot va oziq-ovqat sanoatida ishlatiladigan qizilmiya ildizini yetishtirish bo‘yicha loyihaning natijadorligi bilan bog‘liq tafsilotlar batafsil qalamga olingan.
“Jahon banki ma’lumotlariga ko‘ra, 2017—2021-yillarda O‘zbekistondan qizilmiya ekstrakti eksporti hajmi 30 million dollarga yetgan. O‘zbekiston o‘tgan yili qizilmiya yetishtirish hajmi bo‘yicha dunyoda birinchi o‘rinni egalladi. Qoraqalpog‘iston ushbu loyihaning markazida”, — deb yozadi jurnal.
Maqolada Qizilmiya yetishtiruvchilar milliy assotsiatsiyasi raisi Murat G‘aipovning qizilmiya eksporti sezilarli darajada oshgani haqidagi fikrlari keltirilgan. “Bu hukumatning qo‘shimcha qiymatli mahsulotlar eksportini rag‘batlantirish strategiyasiga mos keladi. Masalan, neft mahsulotlari o‘rniga tayyor plastmassa, paxta o‘rniga to‘qimachilik mahsulotlari”, — deb yozadi nashr.
Qoraqalpog‘istonda qizilmiyani qayta ishlash korxonalari tashkil etilgan bo‘lib, ularning bir qismi xitoylik investorlar ishtirokida tuzilgan. Ushbu korxonalar soliq imtiyozlariga ega bo‘lib, bojxona to‘lovlaridan ozod qilingan.
Hozirgi vaqtda qizilmiya ildiziga asoslangan mahsulotlar assortimenti juda keng - bu shampunlar, choy, dori-darmonlar. Mutaxassisning fikricha, kompaniyalar soni ortishi bilan O‘zbekiston qizilmiya ekstrakti ishlab chiqarishdan tayyor mahsulot ishlab chiqarishga o‘tishi va qizilmiya eksportini ikki barobarga oshirishi mumkin.
Izoh (0)